Коипозитор Людмила Ефимцова
Зындгонд композитор, РЦИ-Аланийы аивæдты сгуыхт архайæг, Гергиты Валерийы номыл аивæдты колледжы ахуыргæнæг Людмилæ Ефимцовайыл сæххæст 70 азы. Йæ юбилейы кадæн, ивгъуыд майрæмбоны Дзæуджыхъæуы центрон библиотекæйы 1 филиалы уыд йемæ фембæлд. Архайдтой дзы йæ хæстæджытæ, æмкусджытæ, культурæ æмæ аивады минæвæрттæ…
Фембæлд цыбыр раныхасæй байгом кодта Дзæуджыхъæуы центрон библиотекæйы 1-æм филиалы сæргълæууæг. РЦИ-Аланийы культурæйы сгуыхт кусæг Мысыкаты Разитæ. Уый зæрдиаг арфæ ракодта уазджытæн, фембæлдмæ кæй саккаг кодтой, уый тыххæй. Композиторы цард æмæ сфæлдыстады тыххæй бæлвырд æмæ мидисджынæй радзырдта аивадиртасæг Остъаты Татьянæ.
– Людмилæ у нæ композитортæн сæ курдиатджындæртæй иу. Бирæ зæрдæмæдзæугæ уацмыстæ ныффыста ирон æмæ уырыссаг поэтты æмдзæвгæтыл, у сывæллæттæн къорд вокалон уацмысы æмæ оперæ «Поручик Лермонтов»-ы автор. Кæны рухстауæн æмæ æхсæнадон куыст. Йæ музыкæйæн кæддæриддæр ссары рæсугъд зæрдæагайгæ ахорæнтæ. Людмилæйы сфæлдыстадон æрмдзæф æнгом баст у Ирыстонимæ. Куыд адæймаг афтæ дæр Людмилæ у уæздан æмæ хæдæфсарм адæймаг. Йæ фыд Темофей Ефимцов уыд зынгонд поэт. Йæ мад та Бæдоаты Ларисæ бирæ азты фæкуыста нæ республикæйы телеуынынады режиссерæй. Йæ ныййарджыты фарн кæддæриддæр аивæй хæссы Людмилæ æмæ зæрдиаг хæрзты цæуы ирон культурæйæн – загъта Остъаты Татьянæ.
Фембæлды сæ курдиат æмæ аивад равдыстой Дзæуджыхъæуы Гергиты Валерийы номыл аивæдты колледжы студенттæ. Уыдон музыкалон инструменттыл ацагътой композиторы цалдæр уацмысы.
– Людмилæйы фыд Тимофей æмæ мад Ларисæ уыдысты уазæгуарзон æмæ бæркадарм хистæртæ. Сæ хæдзар уазæгæй цух никуы уыд. Арæх сæм-иу федтон Ирыстоны æмæ Уæрæсейаг зындгонд поэтты æмæ фысджыты. Тимофей тынг хæларæй цард зындгонд прозаик Виктор Астафьевимæ. Людмилæйы цардæмбал Александр Сухарников уыд зындгонд мызыкæиртасæг –ахуыргонд. Ныффыста цымыдисаг уацтæ советон, уырыссаг ирон музыкалон аивады рæзты тыххæй. Иртæста ирон композиторты цард æмæ сфæлдыстад. Бирæ хæрзты бацыд номдзыд хореограф Аллæ Духовайæн йæ дунеон балет «Тодес» саразыны хъуыддаджы. Людмилæ æмæ Алыксандр схъомыл кодтой фырт Федры. Уый у æфсæддон журналист. Йе ‘рмæджытæ йын бакæсæн вæййы нæ бæстайы дзыллон хабархæссæг фæрæзты, – дзырдта РЦИ-Аланийы культурæйы сгуыхт кусæг, традицион культурæйы æмæ этнотуризмы республикон центр «Фарн»-ы хайады сæргълæууæг Абайты Азау.
Фембæлды рæстæг Людмилæ æмбырды архайджытæн æмæ уазджытæн радзырдта йæ ног сфæлдыстадон фæндты æмæ нысанты тыххæй. Уый фæстæ Дзæуджыхъæуы центрон библиотекæйы 1 филиалы кусджытæн, уазджытæн зæрдиаг арфæ ракодта Людмилæ Ефимцовайы фырт Федр.
21 –æм ноябры ма Дзæуджыхъæуы, Гæздæнты Гайтойы номыл республикон фæсивæдон библиотекæйы дæр уыд Людмилæйы юбилейы кадæн сфæлдыстадон изæр. Архайдтой дзы йæ ахуырдзаутæ аивæдты колледжæй. Зындгонд музыканттæ: Гæздæнты Булат, Махъоты Ацæмæз æмæ Хосроты Тамерлан
Гасанты Валери
