Назбӕлӕстӕ ӕмӕ ногазон дзаумӕттӕ кӕм уӕй кӕндзысты, Ног 2019 азы агъоммӕ Дзӕуджыхъӕуы алыхуызон рӕтты байгом уыдзысты ахӕм базарадон фӕзтӕ.
Бӕлӕстӕ нӕм ӕрбаласдзысты Саратовы, Ульяновскы ӕмӕ Самарӕйы облӕсттӕй, стӕй Канадӕйӕ. Дзӕуджыхъӕуы бынӕттон хиуынаффӕйады администрацийы курдиатмӕ гӕсгӕ, бӕлӕсты ацы азы ӕргътӕ фароны ӕргътӕй нӕ хицӕн кӕндзысты, ӕмӕ афтӕмӕй бӕрӕгбоны сӕйраг ӕвдисӕн балхӕнӕн уыдзӕн ӕппынкъаддӕр 300 сомӕй.
Назбӕлӕсты ӕппӕтӕй егъаудӕр базартӕ ӕрбынӕттон уыдзысты Барбашовы уынджы, Олимпаг парчы раз, Чапаевы ӕмӕ Мӕскуыйаг уынгты, стӕй Доваторы проспекты 9-ӕм бӕстыхайы раз. Уымӕй уӕлдай, ногазон бӕлӕстӕ балхӕнӕн кӕм уыдзӕн, горӕтӕгты удӕнцойдзинадӕн Дзӕуджыхъӕуы ӕппӕт районты кусдзысты 46 ахӕм базарадон бынаты.
Уымӕй уӕлдай, назбӕлӕстӕн хъӕугӕ хъазӕнтӕ ӕмӕ ӕндӕр аивгӕнӕнтимӕ ногазон армукъатӕ фӕзындзысты Денджызон фистӕгӕфсӕддонты ӕмӕ Владикавказаг уынгты, Сабырдзинады проспекты, стӕй Жуковскийы номыл парчы.
15 декабры Къесаты Астаны уынджы 3-аг бӕстыхайы раз скусдзӕн хойраджы армукъа. ӕппӕт базарадон объекттӕ кусдзысты ацы азы 31 декабры онг ӕрвылбон 8 сахатӕй 20 сахатмӕ.
Дзӕуджыхъӕуы администрацийы пресс-службӕ
