2019 азы 13 мартъийы Уӕрӕсейы ӕнӕниздзинад хъахъхъӕнынады министрады уынаффӕмӕ гӕсгӕ нӕ бӕстӕйы цӕрӕг адӕм нырӕй фӕстӕмӕ алы аз дӕр цӕудзысты профилактикон медицинон ӕркастытӕ (нырмӕ цыдысты дыууӕ азмӕ иу хатт); 18-39-аздзыдтӕ ӕртӕ азмӕ иу хатт цӕудзысты диспансеризаци, 40 азӕй уӕлӕмӕ кӕуыл цӕуы, уыдон та — алы аз дӕр.
Уынаффӕйы амынд сты, онкологион низтӕ рагацау базонӕн цӕй фӕрцы ис, ахӕм мадзӕлтты ӕмӕ иртӕстыты номхыгъдтӕ диспансеризацийы къӕпхӕнтӕм гӕсгӕ. Зӕгъӕм, диспансеризацийы дыккаг къӕпхӕны 18-39-аздзыд граждӕнтӕн алы ӕртӕ азы дӕр иу хатт араздзысты:
— онкологион низтӕ рагацау бӕрӕггӕнӕг скрининг;
— медицинон профилактикӕйы кӕнӕ ӕнӕниздзинад хъахъхъӕнынады центрты дохтыр-терапевты профилактикон консультацитӕ.
Профилактикон медицинон ӕркаст ӕмӕ диспансеризаци алы адӕймаг дӕр хъуамӕ цӕуа, цы медицинон кусӕндонмӕ хауы ӕмӕ йын фыццаградон медицинон-санитарон ӕххуыс кӕм кӕнынц, уым.
Ныр та, профилактикон медицинон ӕркаст ӕмӕ диспансеризаци ацы аз цавӕр мадзӕлтты фӕрцы ӕххӕст цӕуы, уый тыххӕй бӕлвырддӕр.
Профилактикон ӕркастӕн йӕ нысан у низтӕ кӕнӕ, сӕ расайынӕн тӕссаг чи у, уыцы ӕууӕлтӕ рагацау базонын; ӕнӕ медицинон амындӕй наркотиктӕй ӕмӕ психотропон буаргъӕдтӕй пайда чи кӕны, ахӕмтӕ раргом кӕнын. Профилактикон ӕркасты рӕстӕг се ‘нӕниздзинады уавӕрмӕ гӕсгӕ адӕмы адих кӕнынц къордтыл, сбарынц сын сӕ туджы ӕлхъывдад; базонынц, холестерин, стӕй сӕкӕр туджы цас ис, уый; сбӕлвырд кӕнынц, зӕрдӕ ӕмӕ тугдадзинты низтӕй фӕрынчынӕй адӕймагӕн цас тӕссаг у, уый; скӕнын кӕнынц улӕфӕнты флюорографи ӕмӕ рентгенографи (дыууӕ азмӕ иу хатт); скӕнынц электрокардиограммӕ (35 азӕй уӕлӕмӕ кӕуыл цӕуы, уыдонӕн ӕй кӕнынц алы аз дӕр); цӕстыты туджы ӕлхъвдад сбарынц (40 азӕй уӕлӕмӕ кӕуыл цӕуы, уыдонӕн алы аз дӕр); 18-39-аздзыд сылгоймӕгты ӕнӕниздзинад сбӕрӕг кӕны фелсыр-акушер кӕнӕ дохтыр акушер-гинеколог.
Диспансеризацийы фыццаг къӕпхӕнӕн йӕ нысан у низтӕ расайынӕн тӕссаг ӕууӕлтӕ сбӕрӕг кӕнын. Уӕлдӕр амынд профилактикон ӕркасты мадзӕлттӕй уӕлдай диспансеризацийы фыццаг къӕпхӕны ас адӕймӕгтӕн скӕнынц:
туджы иумӕйаг анализ, базонынц, цас дзы ис лейкоциттӕ, цас у йӕ гемоглобин, СОЭ (40 азӕй уӕлӕмӕ кӕуыл цӕуы, уыдонӕн);
хъӕугӕ анализтӕ скӕныны фӕстӕ сылгоймӕгтӕм ӕркӕсы дохтыр-гинеколог (18-64-аздзыд сылгоймӕгтӕм ӕртӕ азмӕ иу хатт);
скӕнынц сын маммографи (40-75-аздзыдтӕн дыууӕ азмӕ иу хатт);
алы нӕлгоймагыл дӕр 45, 50, 55, 60, 64 азы куы рацӕуы, уӕд ын кӕнын кӕнынц анализ ПСА;
ӕппӕт уыдӕтты фӕстӕ адӕймагмӕ ӕркӕсы терапевт, равзары анализтӕ, профилактикон ӕгъдауӕй аныхас кӕны адӕймагимӕ ӕмӕ йын бацамоны, дарддӕр ын цы кӕнгӕ у, уый.
Йе ‘нӕниздзинад зӕрдӕхсаинаг кӕмӕн разыны, уымӕн аразын бахъӕуы уӕлӕмхасӕн медицинон-иртасӕн мадзӕлттӕ, ома, ацӕуын ӕй бахъӕуы диспансеризацийы дыккаг къӕпхӕн. Адӕймагӕн саразынц:
алыхуызон специалистты консультацитӕ (невролог, отоларинголог, офтальмолог, хирург, уролог, проктолог, акушер-гинеколог ӕмӕ ӕндӕр специалисттӕ);
скӕнынц ын уӕлӕмхасӕн медицинон-иртасӕн мадзӕлттӕ (улӕфӕнты рентгенографи кӕнӕ та компьютерон томографи, колоноскопи ӕмӕ ӕндӕр бӕлвырд медицинон иртӕстытӕ).
Цӕмӕй хъӕуы райдайын ӕмӕ, фыццаджыдӕр, кӕдӕм хъуамӕ бацӕуа адӕймаг?
Райдайын хъӕуы, алчидӕр нӕ йӕ цӕрӕн бынатмӕ гӕсгӕ цы поликлиникӕмӕ хауы, уым цы профилактикон кабинет ис, уымӕй. Профилактикон медицинон ӕркаст ӕмӕ диспансеризаци ацӕуын кӕм ӕмбӕлы, республикӕйы уыцы медицинон кусӕндӕтты номхыгъд фидаргонд у РЦИ-Аланийы ӕнӕниздзинад хъахъхъӕнынады министрады уынаффӕйы. Уыдон сты:
Дзӕуджыхъӕуы 1-ӕм поликлиникӕ;
Дзӕуджыхъӕуы 4-ӕм поликлиникӕ;
РЦИ-Аланийы Консультацион-диагностикон центр;
Дзӕуджыхъӕуы 7-ӕм поликлиникӕ;
Алагиры районы центрон рынчындон;
Ӕрыдоны районы центрон рынчындон;
Дыгуры районы центрон рынчындон;
Ӕрӕфы районы центрон рынчындон;
Кировы районы центрон рынчындон;
Мӕздӕджы районы центрон рынчындон;
Рахизфарсы районы центрон рынчындон;
Горӕтгӕрон районы центрон рынчындон;
РЦИ-Аланийы ӕнӕниздзинад хъахъхъӕнынады Пульмонологон ӕххуысы республикон центр;
ӕнӕниздзинад хъахъхъӕнынады федералон къазнайадон куыстуат «РЦИ-Аланийы Мидхъуыддӕгты министрады медицинон-санитарон хай»;
гом акционерон куыстуат «Уӕрӕсейы ӕфсӕнвӕндӕгтӕ»-йы ӕнӕниздзинад хъахъхъӕнынады ӕнӕпаддзахадон куыстуат «Цӕгат-Кавказы ӕфсӕнвӕндӕгты Дзӕуджыхъӕуы станцӕйы рынчындон».
Нӕ республикӕйы цӕрджытӕм у нӕ курдиат, цӕмӕй алчидӕр ацӕуа диспансеризаци ӕмӕ бахъахъхъӕна йе ‘нӕниздзинад.
Медицинон профилактикӕйы республикон центр
