Ныхас — ахсджиаг фарстытыл

0
267

“Иры Стыр Ныхас”-ӕн Дзӕуджыхъӕуы цы хайӕдтӕ ис, уыдоны разамонджытӕ алы азы кӕрон дӕр саразынц дзуапдӕттӕн ӕмбырдтӕ. Ахӕм ӕмбырд уыд Цӕгат-Ныгуылӕн зылды Ныхасы уӕнгтӕн. Амыдта йӕ советы сӕрдар Джиоты Яков.

Ӕмбырды райдайӕны равзӕрстой президиум: Кучиты Руслан — “Иры Стыр Ныхас”-ы сӕрдар, Джусойты Руслан — РЦИ-Аланийы Фӕсивӕдон комитеты сӕрдар, Золойты Игор — ӕфсады ветеран, Хъарданты Тимур — историк, стӕй ӕндӕр бӕрнон кусджытӕ.

Советы куысты ивгъуыд азы бӕрӕггӕнӕнтӕм гӕсгӕ, йӕхи активондӕрӕй чи равдыста, уыдонӕн саккаг кодтой Кады грамотӕтӕ.

Цӕмӕй нӕ куыст цӕстуынгӕ, бӕлвырд ӕмӕ ӕргом уа, уый тыххӕй саразӕм ахӕм ӕмбырдтӕ. Уӕд адӕм нӕ фӕрсдзысты, цы кусы “Иры Стыр Ныхас”, зӕгъгӕ, — загъта Кучиты Руслан ӕмӕ къорд адӕймагӕн радта Кады нысантӕ. Уыдонимӕ — Мӕхъиты Григори, Есенаты Барис, Пухаты Владимир, Дзебысаты Ларисӕ ӕмӕ иннӕтӕ.

Дзӕуджыхъӕуы минӕвӕртты ӕмбырды сӕрдары хӕдивӕг Сӕлбиты Зитӕ фембӕлды архайджытӕн арфӕ ракодта, нӕ рагон ӕгъдӕуттӕ ӕмӕ традицитӕ бахъахъхъӕныныл, стӕй фӕсивӕды хъомыладыл кӕй кусынц, уый тыххӕй. Горӕты Кады грамотӕтӕ радта  ахуыргӕнджытӕ, хъомылгӕнджытӕ ӕмӕ ӕхсӕнадон архайджытӕн.

РЦИ-Аланийы Парламенты Кады грамотӕ райстой Цӕллагты Артур, Таутиаты ӕхсар ӕмӕ иннӕтӕ.

Цӕгат-Ныгуылӕн зылды Ныхасы советы сӕрдар Джиоты Яков йӕ дзуаппон доклады ӕрдзырдта, ивгъуыд рӕстӕг иумӕйаг хъарутӕй сӕ къухы цы саразын  бафтыд, цавӕр къуылымпыдзинӕдтыл сӕмбӕлдысты, стӕй фидӕны сӕ размӕ цы нысантӕ ӕвӕрынц, уыдоныл.

— Цӕгат-Ныгуылӕн муниципалон зылды фӕзуат у 1118 гектары, цӕры дзы 124 мин адӕймаджы, уыдонӕн сӕ 67 проценты сты ирӕттӕ. Нӕ куыст  арӕзтам ирон адӕмы съезды уынаффӕты бындурыл, советы афӕдзы ӕмӕ мӕйон пълантӕм гӕсгӕ. Республикӕйы, районы ӕмӕ Дзӕуджыхъӕуы цы мадзӕлттӕ арӕзт фӕцӕуы, уыдоны совет активонӕй архайдта ӕмӕ дарддӕр  дӕр архайдзӕн. Нӕ куыст  баст у адӕмимӕ, уымӕ гӕсгӕ нын аргъ кӕнынц уӕлдӕр хицауад. Ахадгӕ сты цӕрджытимӕ фембӕлдтытӕ, немӕ ӕмцӕдисон вӕййынц горӕты администрацийы ӕмӕ мидхъуыддӕгты районы хайады минӕвӕрттӕ дӕр. Афтӕмӕй нын уыд 134 фембӕлды,  сарӕзтам сыхы ныхӕстӕ, алы кӕрты дӕр ӕвзӕрст ӕрцыд, кадджын ӕмӕ ӕгъдауылхӕст чи у, йӕ ныхасы уӕз кӕмӕн ис, ахӕм лӕгтӕ.

Фӕсивӕды патриотон хъомыладыл  кусгӕйӕ, сабыр ӕмӕ ӕнӕниз цардыуагыл дзургӕйӕ, ӕмбӕлдыстӕм скъолаты, техникумты ӕмӕ колледжты ахуырдзаутимӕ. Цымыдисаг фембӕлдтытӕ уыд Сылгоймӕгты советӕн дӕр рӕзгӕ фӕлтӕримӕ, — загъта Джиойы-фырт.

Ӕмбырды архайджытӕ ма ӕрдзырдтой ӕндӕр  вазыгджын фарстытыл дӕр.

Гугкаты Жаннӕ

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here