Цӕгат Ирыстоны дарддӕр ӕххӕстгонд цӕуы сӕрмагонд федералон программӕ «Ӕрыгон бинонтӕ». Уый фӕлгӕты ноджыдӕр ма 35 ӕрыгон бинонтӕн радтой цӕрӕнуатон сертификаттӕ.
Уыцы цауы фӕдыл кадджын ӕмбырд уыд Дзӕуджыхъӕуы бынӕттон хиуынаффӕйады администрацийы.
Программӕйы архайӕг ӕрыгон бинонтӕн арфӕтӕ ракодтой ӕмӕ сертификаттӕ радтой Дзӕуджыхъӕуы муниципалон сконды сӕргълӕууӕг Икъаты Русланбег, горӕты администрацийы сӕргълӕууӕг Фӕрниаты Тамерлан ӕмӕ арӕзтад ӕмӕ архитектурӕйы министры хӕдивӕг Куыцыкты Анзор.
Зындгонд куыд у, афтӕмӕй 2019 азы ацы программӕйы фӕлгӕты цӕрӕнуатон субсидитӕ райсыны сертификаттӕ радтой 85 ӕрыгон бинонтӕн. Ӕмӕ уыцы куыст адарддӕр уыдзӕн ацы аз дӕр. Сертификатты хицӕуттӕн субсидийы хуызы радих кӕнынц сӕ фидӕны цӕрӕнуаты аргъы 35 проценты бӕрц.
Цӕрӕнуатон субсидитӕ дихгонд цӕуынц бюджетӕй ӕмӕ сӕ барвитынц программӕйы архайджыты сӕрмагонд хыгъдтӕм. Программӕйы архайыны фӕдыл сӕрмагонд куырдиат бадӕттын ӕмбӕлы бӕрнон ведомствӕмӕ (Цӕгат Ирыстоны уый у республикӕйы Арӕзтад ӕмӕ архитектурӕйы министрад). Уыимӕ, программӕйы архайӕг суӕвынӕн ис бӕлвырд домӕнтӕ. Сӕ иу — дыууӕ ӕмкъайаджы кар хъуамӕ 35 азӕй фылдӕр ма уа.
Нӕ уацхӕссӕг
