Уыд Дзӕуджыхъӕуы Минӕвӕртты ӕмбырды ӕвдӕм сесси. Горӕты муниципалон сконды сӕргълӕууӕг Икъаты Русланбег сӕрдариуӕг кӕм кодта, уыцы ӕмбырды архайджытӕ иуӕй-иу ивддзинӕдтӕ бахастой Дзӕуджыхъӕуы бюджетмӕ, стӕй ӕрдзырдтой ӕндӕр фарстытыл дӕр.
Горӕты 2020 аз ӕмӕ 2021-2022 азты пъланы ӕмгъуыдмӕ бюджеттӕм ивддзинӕдтӕ бахӕссыны фарсты фӕдыл раныхас кодта Дзӕуджыхъӕуы администрацийы сӕргълӕууӕджы хӕдивӕг — финансон управленийы хицау Цохъты Хъазыбег. Йӕ ныхасмӕ гӕсгӕ, горӕты сӕйраг финансон документмӕ ивддзинӕдтӕ бахӕссыны фарст сӕвзӕрд, республикон бюджет горӕтӕн уӕлӕмхасӕн фӕрӕзтӕ кӕй радих кодта, уыимӕ. Афтӕ, зӕгъӕм, уыцы бюджетон субсидиты фӕрцы скъолаты ахуыргӕнджыты мызды фондыл бафтыд 121 милуан сомы бӕрц, скъолайы агъоммӕ ахуырады кусӕндӕтты хъомылгӕнджытӕн та — 436 мин сомы бӕрц.
Уӕлӕмхасӕн фӕрӕзтӕ дихгонд цӕуынц горӕты бюджеты иннӕ статьятӕ ӕххӕст кӕнынӕн дӕр. Зӕгъӕм, паддзахадон программӕ «Доступная среда»-йы уагӕвӕрдтӕ ӕххӕст кӕнынӕн республикон бюджет уӕлӕмхасӕн радих кӕндзӕн 1 711,5 мин сомы бӕрц, ӕрыгон бинонтӕн цӕрӕнуӕттӕ аразынӕн та — 30 664, 2 мин сомы бӕрц. Зынгӕ фӕрӕзтӕ ацы аз радих кӕндзысты фӕндаггон куыстытӕн дӕр. Уыцы нысанӕн республикон бюджетӕй Дзӕуджыхъӕууӕн уӕлӕмхасӕн ратдзысты 150 милуан сомы.
Бюджетмӕ бахӕссинаг ивддзинӕдтыл ӕрдзурыны фӕстӕ депутаттӕ сфидар кодтой ӕмбӕлгӕ уынаффӕтӕ.
Боны фӕткы ма уыдысты горӕты ӕрвылбоны цардимӕ баст ӕндӕр фарстытӕ дӕр.
