Арфӕтӕ ӕмӕ хӕрзиуджытӕ — хуыздӕр ахуыргӕнджытӕн

0
142

Цӕгат Ирыстоны хыгъд ӕрцыдысты профессион дӕсныдзинады ӕрвылазон республикон конкурс «Азы ахуыргӕнӕджы» бӕрӕггӕнӕнтӕ. Йӕ уӕлахиздзау ӕмӕ лауреаттӕн кадгӕнӕн ӕмбырд уыд Сывӕллӕтты сфӕлдыстады республикон галуаны.

Ӕхсызгон фембӕлды кадджын уазджытӕ уыдысты РЦИ-Аланийы Сӕргълӕууӕг Битарты Вячеслав, республикӕйы Хицауады Сӕрдары хӕдивӕг Иринӕ Азимова, ахуырад ӕмӕ наукӕйы министр Людмилӕ Башарина, Дзӕуджыхъӕуы бынӕттон хиуынаффӕйады сӕргълӕууӕг Фӕрниаты Тамерлан, Горӕтгӕрон районы муниципалон сконды сӕргълӕууӕг Гаглойты Алан, Дыгуры муниципалон сконды сӕргълӕууӕг Езеты Алан ӕмӕ ӕндӕр бӕрнон кусджытӕ.

Сӕрмагонд жюри бахыгъта конкурсы бӕрӕггӕнӕнтӕ ӕмӕ уӕлахиздзауыл банымадта Беслӕны 8-ӕм скъолайы англисаг ӕвзаджы ахуыргӕнӕг Цорӕты Зитӕйы. Республикӕйы ӕппӕт районтӕй конкурсы чи архайдта, уыцы 64 ахуыргӕнӕджы ‘хсӕн Зитӕ разынд ӕнтыстджындӕр. Конкурсанттӕ мӕйы дӕргъы ӕвдыстой сӕ арӕхстдзинад, ӕххӕст кодтой алыхуызон сӕрмагонд хӕслӕвӕрдтӕ, кодтой гом уроктӕ… Ӕртӕ туры фӕстӕ кӕронбӕттӕн ерысмӕ рацыдысты 5 ахуыргӕнӕджы.

Битарты Вячеслав зӕрдиаг арфӕ ракодта кӕронбӕттӕны ӕппӕт архайджытӕн дӕр ӕмӕ уӕлахиздзауӕн та балӕвар кодта ног фатеры дӕгъӕлтӕ ӕмӕ 500 мин сомы аргъ сертификат. Уымӕй уӕлдай, Цорӕты Зитӕ хъахъхъӕндзӕн Цӕгат Ирыстоны кад хуыздӕр ахуыргӕнджыты ӕппӕтуӕрӕсеон конкурсы кӕронбӕттӕны.

Цӕгат Ирыстоны разамонӕг куыд фӕнысан кодта, афтӕмӕй ацы конкурсы сӕйраг нысантӕ сты курдиатджын ахуыргӕнджыты рабӕрӕг кӕнын, сӕ фӕлтӕрддзинад сын апарахат кӕнын, стӕй сын сӕ дарддӕры профессион рӕзтӕн уӕлӕмхасӕн фадӕттӕ аразын.

— Цӕгат Ирыстоны ахуыргӕнджыты ‘хсӕн бирӕ ис, йӕ дӕсныйадыл ӕнувыд чи у, йӕ арӕхстджын ӕмӕ сфӕлдыстадон февнӕлдӕй бӕрӕг чи дары, ахӕм адӕм. Уымӕн ма иу ӕвдисӕн сси конкурс «Азы ахуыргӕнӕг». Уый архайджытӕ ирдӕй равдыстой сӕ дӕсныдзинад, бакуыстой бирӕ цымыдисаг ахуырадон проекттыл, — бафиппайдта республикӕйы Сӕргълӕууӕг.  — Ахуырады къабазы дӕр хъуамӕ ӕнгом уой алы фӕлтӕрты специалистты бастдзинӕдтӕ, хистӕр кары специалистты хъуамӕ ивой ӕрыгӕттӕ. Ӕмӕ цӕмӕй ӕрыгон специалисттӕ разӕнгардӕй кусой, уымӕн та хъӕуы сӕрмагонд социалон зӕрдӕдарӕнтӕ. Уыцы ӕууӕл хынцгӕйӕ, республикӕйы разамынд кусы ахуыргӕнджытӕн ӕххуысы ӕппӕтвӕрсыг системӕ саразыныл.

Зындгонд куыд у, афтӕмӕй ӕрӕджы республикӕйы Парламентмӕ йе ‘рвылазон ӕрвыстӕджы республикӕйы Сӕргълӕууӕг куыд фӕнысан кодта, афтӕмӕй республикӕйы дарддӕры социалон-экономикон рӕзты хъуыддаджы ахсджиаг бынат ахсынц ахуырады фарстытӕ. Республикӕйы арӕзт ӕмӕ цалцӕггонд цӕуынц скъолатӕ, рӕвдауӕндӕттӕ, уӕлӕмхасӕн ахуырады ног кусӕндӕттӕ, хъомысджындӕр кӕны ахуырады къабазы организациты материалон-техникон ифтонгдзинад.

Республикӕйы Хицауадӕн хӕсгонд ӕрцыд, цӕмӕй бынӕттон бюджетты уӕлӕмхасӕн фӕрӕзтӕ нысангонд ӕрцӕуой ахуыргӕнджытӕн социалон ӕххуысы программӕтӕ ӕххӕст кӕнынӕн.

Ацы аз республикӕ ӕххӕст кӕнын райдайдзӕн сӕрмагонд программӕ «Земский учитель» дӕр. Республикӕйы Сӕргълӕууӕджы ӕрвыстӕджы куыд загъд уыд, афтӕмӕй ацы ӕмӕ иннӕ программӕтӕ ӕмӕ проекттӕ ахъаз уыдзысты хъӕууон скъолаты куыст фӕахадгӕдӕр кӕнынӕн, стӕй иннӕ лыггӕнинаг фарстытыл бакусынӕн.

Куыд загътам, афтӕмӕй профессион дӕсныдзинады конкурсы фӕуӕлахиз Цорӕты Зитӕ. Дыккаг бынат жюри саккаг кодта Дигорайы 2-ӕм скъолайы англисаг ӕвзаджы ахуыргӕнӕг Гуӕздӕрты Мӕдинӕйӕн — уый райста 500 мин сомы аргъ сертификат. Ӕртыккаг бынат ӕмӕ 300 мин сомы аргъ сертификат радтой прогимназ «Эрудит»-ы райдайӕн кълӕсты ахуыргӕнӕг Елойты Неллийӕн. Уымӕй уӕлдай конкурсы кӕронбӕттӕны архайджыты дипломтӕ ӕмӕ ӕхцайы премитӕ 50 мин сомы бӕрцӕй райстой Мӕздӕджы 3-ӕм скъолайы райдайӕн кълӕсты ахуыргӕнӕг Мария Марухина ӕмӕ Дзӕуджыхъӕуы 15-ӕм скъолайы райдайӕн кълӕсты ахуыргӕнӕг Ольгӕ Маликова. Конкурсы ӕрдӕгкӕронбӕттӕны 10 архайӕгӕн дӕр саккаг кодтой сӕрмагонд дипломтӕ ӕмӕ ӕхцайы призтӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here