Суткӕйы дӕргъы уӕлдӕфы рӕстӕмбис температурӕ 15 градусӕй къаддӕр кӕнын куы райдайы, уӕд ӕрдзыхъӕды ӕууӕлтӕм гӕсгӕ фӕззӕг ралӕууы. Нӕ республикӕйы территорийыл, уӕлдӕфы температурӕ 15 градусӕй дӕлдӕр цӕуын сентябры ӕртыккаг декадӕйы кӕй райдайы, уымӕ гӕсгӕ, ацы мӕйы фылдӕр хай банымайӕн ис сӕрды кӕроныл.
Арӕх сентябры уӕлдӕфы рӕстӕмбис температурӕ вӕййы 15-18 градусы хъарм. Ӕхсӕвы уӕлдӕфы температурӕ ӕрхӕццӕ уыдзӕн 8-15 градусмӕ (мӕйы кӕрон та — 4-6 градусмӕ). Бонӕй уӕлдӕф схъарм уыдзӕн 18-25 градусы онг, хицӕн бонты нӕм, Цӕгатаг Африкӕйӕ сур хъарм уӕлдӕф куы ӕрбадыма, уӕд та уӕлдӕфы температурӕ схиздзӕн 28-31 градусмӕ.
Бирӕ азты бӕрӕггӕнӕнтӕм гӕсгӕ, ӕппӕтӕй уазалдӕр сентябр уыд 1997 азы (уӕд уӕлдӕфы рӕстӕмбис температурӕ уыд 12 градусы хъарм), ӕппӕтӕй хъармдӕр сентябр та — 1994 азы (19 градусы хъарм).
Сентябры республикӕйы хохрӕбын районты рауары 68-75 миллиметры, быдыры районты та — 35 миллиметры бӕрц. Уыдзӕн тӕрккъӕвдатӕ, хицӕн бонты ӕрвнӕрдимӕ.
Аллӕ Филимонова,
инженер-синоптик
