22-26 сентябры горӕт Самарӕйы уыд дунеон конкурс «Виват, Баян!». Уый арӕзт ӕрцыд УФ-йы Культурӕйы министрады, нӕ бӕстӕйы Культурӕйы фонды ӕмӕ Поволжьейы музыкантты аивады рӕзты фонды хъӕппӕрисӕй.
Конкурсы нысан у ӕрыгон курдиатджын музыкантты аивады ӕмӕ курдиаты рӕзтӕн гӕнӕнтӕ аразын, нӕ бӕстӕйы музыкалон культурӕйы хӕзнатӕ адӕмы ‘хсӕн парахат кӕнын.
Конкурсы архайдтой нӕ бӕстӕйы аивадон-музыкалон ахуыргӕнӕндӕтты студенттӕ. Се ‘хсӕн — Дзӕуджыхъӕуы, Гергиты Валерийы номыл, аивӕдты колледжы фӕндырдзӕгъдджыты къорды уӕнгтӕ — Плиты Ацӕмӕз, Тауытты Витали ӕмӕ Икъаты Давид (сӕ аивадон разамонӕг у колледжы ахуыргӕнӕг, курдиатджын музыкант Хъоцылаты Сослан). Уыдон конкурсы ацагътой композитортӕ Георгий Свиридов, Евгений Дербенко, Ӕлборты Феликс ӕмӕ Дзуццаты Сослан кӕй ныффыстой ӕмӕ кӕуыл бакуыстой, уыцы уацмыстӕ.
Конкурс «Виват, Баян!»-ы жюрийы сӕрдар, Уӕрӕсейы Музыкӕйы академийы доцент Александр Селиванов ӕмӕ жюрийы уӕнгты, зындгонд музыкантты хатдзӕгтӕм гӕсгӕ ирыстойнаг курдиатджын музыканттӕн дыууӕ номинацийы саккаг кодтой дыккаг къӕпхӕны лауреатты дипломтӕ. Уымӕй уӕлдай ма сын лӕвӕрд ӕрцыд сӕрмагонд сертификат. Йӕ фӕрцы та Тауытты Витали, Плиты Ацӕмӕз ӕмӕ Икъаты Давид ноябры Португалийы архайдзысты дунеон музыкалон конкурс «Трофей мира»-йы.
Дзӕуджыхъӕуы Аивӕдты колледжы ахуыргӕнӕг Хъоцлаты Сослан нын куыд радзырдта, афтӕмӕй, фестивал «Виват, Баян!”-мӕ ацӕуыны тыххӕй сын хорз ӕххуыс бакодта Самарӕйы ирон национ-культурон центр «Алани»-йы сӕрдар Хъойбайты Станислав.
Гасанты Валери
