Республикӕ Цӕгат Ирыстон-Алани ӕмӕ Челябинскы облӕсты паддзахадон филармониты разамонджытӕ бафыстой ӕмгуыстады бадзырд.
Уый тыххӕй фехъусын кодта Цӕгат Ирыстоны Культурӕйы министрады пресс-службӕ.
Пресс-службӕйы минӕвары ныхасмӕ гӕсгӕ, дыууӕ регионы аивадон-музыкалон ведомствӕтӕ бакусдзысты иумӕйаг сфӕлдыстадон ӕмӕ концертон проекттыл.
«Афтӕ, ӕмгуыстады бадзырды бындурыл арӕзт проекттӕй иу суыдзӕн Цӕгат Ирыстоны паддзахадон филармонийы аивадон разамонӕг Магкоты Ацӕмӕзы концерт горӕт Челябинскы (уый уыдзӕн декабры). Ахӕм фӕндон бахаста Челябинскы камерон музыкӕйы залы директор Иринӕ Андреева. Ныр дыууӕ филармонийы минӕвӕрттӕ уыцы концерт бацӕттӕ кӕныныл бакусдзысты», — загъд ис Культурӕйы министрады пресс-службӕйы хъусынгӕнинаджы.
Фӕстӕдӕр Магкоты Ацӕмӕз журналисттӕн куыд радзырдта, афтӕмӕй ахӕм бадзырд фарон бафыстой Новосибирскы паддзахадон филармониимӕ дӕр.
«Ахӕм бадзырдтӕ махӕн фадат дӕттынц регионты ‘хсӕн культурон бастдзинӕдтӕ ӕнгомдӕр кӕнынӕн, иумӕйаг сфӕлдыстадон проекттӕ аразынӕн. Кӕй зӕгъын ӕй хъӕуы, Ирыстоны цӕрджытӕн ӕхсызгон уыдзӕн Челябинск кӕнӕ Новосибирскы сфӕлдыстадон коллективты аивадимӕ базонгӕ уӕвын, нӕ артисттӕн та фылдӕр фадӕттӕ уыдзӕн уыцы регионтӕм сфӕлдыстадон балцыты ацӕуынӕн», — загъта Магкойы-фырт.
Нӕ уацхӕссӕг
