Республикӕ Цӕгат Ирыстон-Аланийы Сӕргълӕууӕг Битарты Вячеславӕн кусӕг фембӕлд уыд национ-культурон ӕхсӕнад «Уырыс»-ы сӕрдар Владимир Писаренкоимӕ.
Фембӕлды райдайӕны Цӕгат Ирыстоны разамонӕг ӕхсӕнадон организацийы уӕнгтӕн арфӕ ракодта, республикӕйы цӕрӕг адӕмты ӕнгомдзинад ӕмӕ хӕлардзинады хъуыддагмӕ аккаг ӕвӕрӕн кӕй хӕссынц, уый тыххӕй. Битары-фырт куыд фӕнысан кодта, афтӕмӕй Цӕгат Ирыстоны хуызӕн бирӕнацион регионы уӕлдай ахсджиаг у алы адӕмыхӕттыты ‘хсӕн хӕлар ахастдзинӕдтӕ ӕмӕ фидыд хъахъхъӕнын. Ӕмӕ, уыцы фӕрныг нысантыл кусгӕйӕ, йӕ ныхасмӕ гӕсгӕ, уӕлдай ахсджиаг ахадындзинад ис республикӕйы национ-культурон ӕхсӕнадтӕн.
— «Уырыс» ӕнгом ӕмархайд кӕны хицаудзинады паддзахадон оргӕнтимӕ дӕр. Ӕмӕ уыцы куыст адарддӕр кӕнын хъӕуы. ӕрмӕстдӕр иумӕйаг хъарутӕй бафтдзӕн нӕ къухы алы адӕмыхӕттыты ‘хсӕн хорз ахастдзинӕдтӕ ӕмӕ хӕлардзинад фидардӕр кӕнын, — загъта Битарты Вячеслав.
Владимир Писаренко республикӕйы Сӕргълӕууӕгӕн бӕстон радзырдта, ӕхсӕнадон организаци йӕ архайды сӕйрагдӕр ӕргом цы фарстытӕм здахы, уый тыххӕй. «Уырыс»-ы разамонӕг бӕлвырд фӕндӕттӕ бахаста регионы цӕрджыты ‘хсӕн национ фидыд хъомысджындӕр кӕныны нысаниуӕгӕн.
РЦИ-Аланийы Сӕргълӕууӕджы ӕмӕ Хицауады пресс-службӕ
