Республикӕ Цӕгат Ирыстон-Аланийы Национ ахастдзинӕдты фарстыты фӕдыл министрады сӕргълӕууӕг Цуциты Аслан сарӕзта радон фембӕлд республикӕйы журналисттимӕ. Йӕ ныхасы сӕр уыд РЦИ-Аланийы программӕ «Ирон адӕмы национ-культурон рӕзт 2018-2020 азты».
Министр куыд бацамыдта, афтӕмӕй ацы программӕ арӕзт ӕрцыд республикӕйы Сӕргълӕууӕг Битарты Вячеславы хъӕппӕрисӕй. Ис дзы дыууӕ дӕлпрограммӕйы: фыццаг у ирон адӕмы национ-культурон хӕдбындур бахъахъхъӕнын, дыккаг та —ирон ӕвзаг бахъахъхъӕнын ӕмӕ райрӕзын кӕнын.
— Ацы программӕйыл кусын райдыдтам 2017 азы. Республикӕйы Сӕргълӕууӕг Битарты Вячеслав къорд хатты фембӕлд программӕйы архайджыты разамонджытимӕ. Министрадтӕ ӕмӕ комитеттӕн бахӕс кодта, цӕмӕй дзы алкӕцы дӕр зӕрдиагӕй бацархайа, цы фарстытӕ йӕм дзы хауы, уыдон нывыл ӕмӕ афойнадыл бацӕттӕ кӕныныл.
Программӕ бацӕттӕ кӕныны бӕрнон хӕс баргонд ӕрцыд ӕмӕ йӕ цӕттӕдзинадӕн дзуапп лӕвӕрдта мах министрад, архайдтой ма йыл Ахуырад ӕмӕ наукӕйы, Культурӕйы министрадтӕ, республикӕйы фӕсивӕды хъуыддӕгты фӕдыл, мыхуыры, культурӕйы бынты объекттӕ хъахъхъӕныны, туризмы фӕдыл комитеттӕ.
2017 азы мах ӕмбырд кодтам информаци ӕмӕ фӕндӕттӕ уыцы министрадтӕ ӕмӕ комитеттӕй, цӕмӕй саразӕм алывӕрсыг уӕрӕх программӕ ирон ӕвзаг ӕмӕ ирон адӕмы монон бынтӕ бахъахъхъӕныны тыххӕй. Бацӕттӕ йӕ кодтам ӕмӕ йӕ сфидар кодтам 2017 азы декабры. Уый арӕзт уыд 2018, 2019, 2020 азтӕн.
Ныртӕккӕ мах кусӕм ног программӕйыл. Нӕ хъуыдымӕ гӕсгӕ, йӕ ном баззайдзӕн, ныртӕккӕ цы программӕ ӕххӕст кӕнӕм, уый номы хуызӕнӕй. Йӕ сӕххӕст кӕныны ӕмгъуыд уыдзӕн 2021 азӕй 2025 азы онг.
Мах бахыгътам, фыццаг программӕйы цы цӕлхдуртыл сӕмбӕлдыстӕм, уыдон, цыдӕртӕ ма йӕм бафтыдтам, цыдӕртӕ дзы аиуварс кодтам. ӕмткӕй райсгӕйӕ, программӕ ӕххӕстгонд ӕрцыд ӕнтыстджынӕй. Финансты министрад афойнадыл ӕмӕ ӕххӕстӕй лӕвӕрдта ӕхцайы фӕрӕзтӕ программӕйы ӕппӕт архайджытӕн дӕр. Цы мадзӕлттӕ арӕзт цыд, уыдон уыдысты адӕмӕн цымыдисаг ӕмӕ бӕрзонд хъӕугӕ ӕмвӕзадыл.
Программӕйы нысантӕ ӕххӕстгонд ӕрцыдысты, бирӕ стыр ӕмӕ ахсджиаг проекттӕ сӕххӕст кӕнын нӕ бон бацис.
Ныртӕккӕ цы ног программӕйы проект бацӕттӕ кодтам, уый республикӕйы Хицауад сфидар кӕндзӕн, ӕмӕ нӕ бон бауыдзӕн ноджы фылдӕр мадзӕлттӕ саразын нӕ культурӕйы бынтӕ бахъахъхъӕнынӕн. Рӕдыдтытӕ, хъуагдзинӕдтӕ дӕр дзы уыдис, бирӕ фарстытӕ, куыд нысан кодтам, афтӕ нӕ рауадысты. Уыдонӕй иу у, Хуссар Ирыстонимӕ цы мадзӕлттӕ снысан кодтам гуманитарон иртасӕн фарстыты фӕдыл, уый. Арӕзт ӕрцыд терминты къамистӕ нӕ республикӕйы дӕр ӕмӕ Хуссар Ирыстоны дӕр.
Цалдӕр хатты сӕмбӕлдыстӕм. Сарӕзтам иумӕйаг программӕтӕ, уымӕн ӕмӕ абон гуманитарон, наукон ӕмӕ культурон къабӕзты фаг ӕмархайд нӕ цӕуы. Нысан кодтам наукон журнал рауадзын ирон ӕвзагыл, фӕлӕ периодикон оргӕн саразын нӕ къухы нӕ бафтыд. Дыууӕ хатты арвыстам фыстӕджытӕ сӕ хицауады номыл, фӕлӕ дзуапп нӕ райстам. Журнал хъуамӕ цыдаид ам, Цӕгат Ирыстоны гуманитарон ӕмӕ социалон иртасӕнты институты.
Фӕлӕ нын уӕддӕр цыдӕртӕ бантыст. Иртасӕн институты сарӕзтам ӕрыгон ахуыргӕндты скъола. Ӕхца йын фыст цӕуы программӕйы фӕрӕзтӕй. Ӕмӕ Хуссар Ирыстоны ӕрыгон ахуыргӕндтӕ зӕрдиагӕй архайынц уыцы скъолайы. Фарон дӕр ахӕм проект сарӕзтам Цӕгат-Хуссары медиатыгъдады. Уым архайдтой Цӕгат ӕмӕ Хуссар Иры журналисттӕ. Уый ахъаз у иумӕйаг информацион тыгъдад уӕрӕхдӕр кӕнынӕн. Уыдонӕй хатдзӕгтӕ скодтам ӕмӕ сӕ ног программӕйы сӕххӕст кӕныныл бацархайдзыстӕм.
Ирон ӕвзаг чи ахуыр кӕны, уыдоны разӕнгард кӕнынӕн цавӕр мадзӕлттӕ нысангонд цыдысты ацы программӕйы ӕмӕ куыд ӕххӕстгонд ӕрцыдысты, ууыл куы дзурӕм,уӕд зӕгъдзынӕн афтӕ: Ирон гимназ байгом кӕнынӕн ӕмӕ йӕ куыстӕн ӕхцайы фӕрӕзтӕ дӕр дихгонд цыдысты паддзахадон программӕйы ӕхцайы фӕрӕзтӕй.
Арӕзт ӕрцыд бирӕ алыхуызон мадзӕлттӕ ацы программӕмӕ гӕсгӕ. Фӕсивӕды хъуыддӕгты фӕдыл комитет сарӕзта хуыздӕр аргъау ирон ӕвзагыл ныффыссыны конкурс. Ӕмӕ нӕ, раст зӕгъгӕйӕ, дисы бафтыдта, конкурсы архайджытӕ куыд бирӕ уыдысты, уый. Уыцы аргъӕуттӕн сӕ хуыздӕртӕ мыхуыргонд ӕрцыдысты хицӕн чиныгӕй, — радзырдта Цуциты Аслан. Уый кӕронбӕттӕны бӕлвырд ӕмӕ бӕстон дзуаппытӕ радта журналистты ӕппӕт фарстытӕн дӕр
Касаты Батрадз
