Цæгат Ирыстоны дарддæр архайд цæуы, туризмы къабазы чи кусы, уыцы экскурсоводтæ, гидтæ æмæ иннæ специалистты профессион цæттæдзинадыл. Афтæ, ацы бонты ма иу ахæм специалистты къорд сæххæст кодта паддзахадон аттестацийы домæнтæ
Уый тыххæй фехъусын кодта РЦИ-Аланийы Экономикон рæзты министрады пресс-службæ.
Министрады минæвары ныхасмæ гæсгæ, ныр уыцы специалистты нæмттæ хаст æрцæудзысты экскурсоводтæ æмæ гидтæ-тæлмацгæнджыты республикон реестрмæ. Уымæй уæлдай, аттестацийы хæслæвæрдтæ æнтыстджынæй чи сæххæст кодта, уыцы специалисттæн ныр лæвæрд æрцæудзысты электронон æвдисæндартæ. Уый уыдзæн, амынд адæймагæн туристон лæггæдтæ кæныны бар кæй ис, уый æвдисæг сæйраг документ.
Аттестацимæ йæ гæххæттытæ чи балæвæрдта, уыцы адæмæн тесттæ æмæ квалификацион фæлварæнтæ арæзт цыдысты центр «Мæ бизнес»-ы. Алкæцы кандидат дæр хъуамæ равдиса йæ зонындзинæдтæ Ирыстоны историйы, культурæйы, удварны хæзнатæ æмæ цымыдисагдæр æрдзон объектты тыххæй, хъуамæ цæттæ уа туристты бирæ фарстытæн бæстон дзуаппытæ раттынмæ. Экскурсоводы зонын хъæуы туристон архайд аразыны фæдыл закъонæвæрынад æмæ æндæр нормативон уагæвæрдтæ, хъуамæ къæрцхъус уа хæхтæ æмæ æндæр æрдзон бынæтты æдасдзинады домæнтæ æххæст кæнынмæ…
Экономикон рæзты министрады (зындгонд куыд у, афтæмæй ацы ведомствæ ныр бæрнон у туризмы рæзтимæ баст æппæт фарстатыл дæр) минæвары ныхасмæ гæсгæ, 2025 азы 1 мартъийæ фæстæмæ экскурсовод æмæ гиды куыст кæныны бар ис æрмæстдæр аттестацигонд специалисттæн. Цæгат Ирыстоны уыцы архайд кæнынмæ тырнынц бирæ адæм. Профилон хайадмæ курдиæттæ чи бадæтты, уыдоны хъуыддæгтæм рæстæгæй-рæстæгмæ æркæсы сæрмагонд къамис.
Абоны онг аттестацийы тыххæй æвдисæндартæ республикæйы раттой 150 специалистæй фылдæрæн.
Уæлдæрамынд фарстатæ лыггонд цæуынц фыццаградон национ проект «Туризм æмæ уазæгуарзондзинад»-ы уагæвæрды бындурыл.
КАЛМАНТЫ Аслан
