Национ телеканал «Осетия-Ирыстон»-ы сарæзтыл сæххæст 8 азы. Уыцы цауимæ бастæй РЦИ-Аланийы Сæргълæууæг Сергей МЕНЯЙЛО фембæлд телекомпанийы кусджыты къордимæ.
Регионы разамонæг телеканалы кусджытæн арфæ ракодта сæ бæрæгбоны фæдыл, стæй республикæйы паддзахадон хæрзиуджытæ ратта коллективы минæвæрттæн.
Сергей Меняйло йæ раныхасы куыд фæбæрæг кодта, афтæмæй телеканал «Осетия-Ирыстон»-æн сæрмагонд бынат ис республикæйы дзыллон информацийы фæрæзты тыгъдады.
– Сымах æрвылбоны куысты фæрцы регионы цæрджытæм телеуынынады эфирæй афойнадыл хæццæ кæны æргом, рæстаг æмæ хъæугæ информаци. «Осетия-Ирыстон» сси республикæйы царды æнæфæхицæнгæнгæ хай, телекомпани хайджын у адæмы уарзондзинад æмæ æууæнкæй. Коллективы алкæцы уæнгæн дæр бузныг зæгъын бæрзонд профессион дæсныдзинад æмæ куыстмæ бæрнон ахасты тыххæй, – йæ арфæйы ныхасы фæбæрæг кодта Цæгат Ирыстоны разамонæг.
Уый фæстæ телеканалы кусджыты къордæн лæвæрд æрцыдысты хæрзиуджытæ. Афтæ, бæрзонд профессион дæсныдзинад æмæ куыстадон æнтыстдзинæдты тыххæй кадджын ном «Республикæ Цæгат Ирыстон-Аланийы сгуыхт журналист» раттой тематикон равдыстыты службæйы шеф-редактор Гуыбаты Людмилæйæн, Цæгат Ирыстоны Кады грамотæ та райстой Гæджынаты Зæлинæ, Калманты Зæлинæ, Кцойты Тамилæ, Моргуаты Ладæ æмæ Токаты Аллæ. Уымæй уæлдай, телекомпанийы 21 кусæгæн саккаг кодтой РЦИ-Аланийы Сæргълæууæджы арфæйы фыстæджытæ.
РЦИ-Аланийы Сæргълæууæг æмæ Хицауады пресс-службæ
