Æртыккаг Кавказаг инвестицион форум цæттæгæнæг комитет куыд фехъусын кодта, афтæмæй равдысты кæронбæттæн боны сбæрæг уыдзысты æппæтуæрæсеон инвестицион преми «Вершина»-йы лауреаттæ.
Зындгонд куыд у, афтæмæй амынд дунеон равдыст арæзт цæуы Уæрæсе-
йы Президент Владимир Путины уынаффæйæ. Форумы сæйрагдæр нысантæ сты Цæгат Кавказы федералон зылды дарддæры экономикон райрæзтæн ахъаз кæнын, ахадгæдæр инновацион проекттæ царды уадзын, егъаудæр инвесторты æргом регионмæ здахын.
Ацы хатт форум йæ куыст кæндзæн 2026 азы 17-19 майы Стъараполы крайы равдыстыты дунеон центр «Минводы Экспо»-йы.
Равдысты программæйы сæрмагонд бынат бацахсы инвестицион преми «Вершина»-йы ног лауреатты сбæрæг кæныны æмбырд. «Ацы премийы фæрцы рæгъмæ рахæссæм, Цæгат Кавказы регионты дарддæры экономикон райрæзтыл комкоммæ чи ахады, уыцы ахсджиагдæр æмæ цымыдисагдæр инвестицион проекттыл куыст, сæ автортæн сын кад скæнæм, се ’нтыстджындæр программæты фæлтæрддзинадмæ сын раздахæм амалхъомадон æхсæнад æмæ экспертты ’ргом», – форуммæ цæттæ кæныны фарстатыл дзургæйæ, бафиппайдта Уæрæсейы Хицауады Сæрдары хæдивæг Александр Новак.
Ацы хатт преми «Вершина» лæвæрд æрцæудзæн 11 номинацийы. Организаторты ныхасмæ гæсгæ, конкурсон къамисмæ бадæттæн ис, 2023-2026 азты куыст цы ахадгæ инвестицион проекттыл цыд, уыдон. Уыимæ, уыцы проекттæ хъуамæ бæрæг дарой сæ инновацион хъомысæй, раззагдæр технологон уынаффæтæй, стæй уæрæсейаг регионты дарддæры социалон-экономикон райрæзтмæ зынгæ бавæрæнæй.
Инвестицон преми райсыны фæдыл курдиæттæ бадæттæн ис 2026 азы 1 мартъийы онг.
«Вершина»-йы номинацитæ æмæ курдиæттæ бадæттыны фæткы тыххæй бæлвырд бæрæггæнæнтæ мыхуыргонд сты Кавказаг инвестицион форумы официалон сайты: forumkavkaz.org дæлхайад “Преми»-йы.
Дмитрий АСТАХОВ
