Дзæуджыхъæуы цæрæг, Фыдыбæстæйы Стыр хæсты архайæг КЪÆБУЛТЫ Павелыл сæххæст 102 азы. Кадджын ветеранæн йæ бæрæгбоны фæдыл арфæтæ ракодтой горæты администрацийы бæрнон кусджытæ.
Уый тыххæй фехъусын кодта Цæгат Ирыстоны сæйраг горæты админис-
трацийы пресс-службæ.
Пресс-службæйы минæвары ныхасмæ гæсгæ, Къæбулы-фырты йæ хæдзары бабæрæг кодтой Дзæуджыхъæуы бынæттон хиуынаффæйады админис-
трацийы сæргълæууæг Милдзыхты Вячеслав, Минæвæртты æмбырды депутат Виталий Калашников æмæ районы бынæттон администрацийы разамонæг Дзотты Ацæмæз.
Уазджытæн зæрдæбын ныхас рауад фысымтимæ, бинонтæ сын ракодтой Павелы хæстон фæндæгты, стæй йæ дарддæры царды хабæрттæ. Арфæтæ æмæ зæрдылдарæн лæвæрттæй уæлдай, муниципалитеты разамынды уынаффæйæ Къæбулы-фыртæн лæвæрд æрцыд майдан «Дзæуджыхъæу – Хæстон намысы горæт» дæр.
Павел райгуырд Хуссар Ирыстоны 1923 азы. 1942 азы йæм фæсидтысты Сырх æфсады рæнхъытæм, службæ кодта арæнхъахъхъæнæг æфсæдты кавалерион дæлхайæдтæй иуы. Уæлахизы бон æй æрæййæфта Китаимæ паддзахадон арæныл. Хæсты
фæстæ йе ’фсæддон службæ адарддæр кодта кавалерион полчъы Манголы республикæимæ паддзахадон арæныл. Æфсæддон службæйы фæстæ сыздæхт Хуссар Ирыстонмæ, куыста хъæууон советтæй иуы.
Ныртæккæ Къæбулты Павел йæ бинонтимæ цæры Дзæуджыхъæуы.
Нæ уацхæссæг
