РЦИ-Аланийы Сæргълæууæг Сергей Меняйлойы разамындæй уыд Коррупцийы ныхмæ архайды фарстаты фæдыл республикон къамисы радон æмбырд. Фембæлды архайджытæ рагагъоммæ хатдзæгтæ скодтой афæдзы куысты бæрæггæнæнтæн, æрдзырдтой фидæн азы архайды фыццаградон нысантыл.
Бюджетон закъонæвæрынад æххæст кæныны хъуыддаджы афæдзы дæргъы цы æгъдаухæлдтытæ рабæрæг, уыдоны фæдыл уыд йæ раныхас Цæгат Ирыстоны Контролон-ревизион управленийы разамонæг Дзугкойты Аланæн. Йæ ныхасмæ гæсгæ, афæдзы райдайæнæй нырмæ управленийы специалисттæ финансон-бюджетон къабазы цы æгъдаухæлдтытæ раиртæстой, уыдонæн сæ иумæйаг бæрц 88 милуан сомæй фæфылдæр. Уыцы цæстдарæн архайды бæрæггæнæнты бындурыл арæзт æрцыд административон æгъдаухæлдтыты тыххæй суагъæтæ. Уыдонæй ныридæгæн æркастæуыд 8 административон хъуыддагмæ.
Къамисы уæнгтæ сæрмагонд æргом аздæхтой, республикæйы алы исбонады кусæндæтты мызд фидыны фарста куыд лыггонд цæуы, уымæ дæр. «Бæстон æркæсын хъæуы, регионы организацитæ æмæ кусæндæтты мызд фидыны тыххæй закъон-æвæрынад цас бæстон æххæстгонд цæуы, уымæ. Контролон оргæнтæн хæс кæнын уыцы куыст фидæн азы пъланмæ бахæссын», – бафиппайдта Сергей Меняйло.
Дарддæр республикæйы Сæргълæууæг куыд фæбæрæг кодта, афтæмæй фыццаградон æргом здахын хъæуы, нысанмæарæзт паддзахадон прог-раммæтæ æмæ национ проектты уагæвæрдтæ æххæст кæнынæн цы финансон фæрæзтæ дихгонд цæуы, уыдон хардз кæныны хъуыддагмæ дæр. Ахæм бæстон цæстдард, йæ ныхасмæ гæсгæ,
хъуамæ уа паддзахадон æмæ муниципалон нысаниуæджы æлхæнинæгтæ æмæ æндæр ахæм бюджетон хæрдзтæ кæнгæйæ дæр.
Боны фæткы фарстатыл докладтæ скодтой РЦИ-Аланийы Сæргълæууæджы цур Коррупцийы ныхмæ тохы фарстаты фæдыл управленийы разамонæг Баскаты Эльбрус, Кировы районы муниципалон сконды сæргълæууæг Нæкуысаты Барис æмæ иннæтæ.
Æмбырды кæронбæттæны къамисы уæнгтæ сфидар кодтой 2026 азы куысты пълан.
Æмбырды архайдтой РЦИ-Аланийы сæйраг федералон инспектор Сергей Гончаров, Цæгат Ирыстоны Хицауады Сæрдар Дзанайты Барис, Æхсæнадон палатæйы сæрдар Нинæ Чиплакова, хицаудзинады æххæстгæнæг оргæнтæ æмæ тыхы ведомствæты минæвæрттæ.
Калманты Аслан
