Æдзард хæстонты нæмттæ сæнусон кæнын – ахæм стыр нысанимæ Дзæуджыхъæуы 38-æм скъолайы сарæзтой номарæн æмбырд сæ рауагъдон Хортиты Аланы фырт Давиды кадæн.
Ирыстоны хъæбултæ, сæрмагонд æфсæддон операцийы архайгæйæ, терроризмы ныхмæ быцæуты æвдисынц уды фидардзинад æмæ хъару. Фæлæ хæст хæст у, æмæ знаджы нæмгуытæ никæуыл ауæрдынц, хъыгагæн.
Ныр фæндзæм хатт скъолайы ахуырдзаутæ æмæ ахуыргæнджытæ сæркъулæй лæууынц, сæ цæссыг нæ уромынц, хуызистытæм кæсгæйæ. Цардхъуагæй фæмард сты Цыхуырбаты Роланд, Уыртаты Витали, Трунавичус Ричардас, Андреев Кирилл æмæ хæрзæрыгон Хортиты Давид. Æрмæст 19 азы цыдис ацы хæрзконд сæрæн лæппу-йыл. Скъолайы фæстæ афойнадыл нæ балæвæрдта йæ гæххæттытæ ахуырмæ, ацыдис æфсадмæ Приморьейы краймæ. Фæндыдис æй æфсæддон суæвын. Мæ бæллицмæ фæхæстæг дæн, зæгъгæ, барвæндонæй контракт бафыста æфсæддон хæйттæй иуимæ.
Запорожьейы облæсты йæ æфсæддон хæс æххæст кæнгæйæ, хъæбатырæй фæмард ирон лæппу. Æцæгæлон зæххыл ныккалд йæ мæгуыр туг. Æндонæй сæ удыхъæд разынд ныййарджытæн: афæдзæй фылдæр, Давиды агургæйæ, куыд бафæрæзтой. Йæ амæлæты фæстæ йын раттой Лæгдзинады орден.
Æмбырды райдайæны залмæ æрбахастой Уæрæсе æмæ Ирыстоны тырысатæ, Национ гвардийы æфсæддон оркестр ныццагъта нæ бæстæ æмæ нæ респуб-ликæйы гимнтæ. Адæм иу уысм æдзæмæй алæууы-дысты.
РЦИ-Аланийы ахуырад æмæ наукæйы министры хæдивæг Дзанайты Марк хъыгзæрдæйæ тæфæрфæс ракодта хиуæттæн.
– Абон иууылдæр мысæм, цардæй чи нæ бафсæст, йе ’мгæртты ’хсæнæй чи
фæхъуыд, уыцы хъæбатыр – Давиды. Знаджы ныхмæ ныфсджынæй рацыд, лæгдзинад равдыста. Парти «Иугонд Уæрæсе»-йы хъæппæрисæй нæ хъæбатырты нæмттæ сæнусон кæнынæн гом кæндзыстæм мемориалон фæйнæджытæ, номарæн партæтæ æмæ æндæр мысæнтæ. Нæ фыдæлтæ Фыдыбæстæйы Стыр хæсты цы æхсардзинад равдыстой, уый ахъардта сæ фæдонты туджы, æмæ абон Хортиты Давиды хуызæн хъæбатыр лæппутæ хъахъхъæнынц Райгуырæн зæхх националисттæй. Сæ нæмттæ рох никуы уыдзысты ахуырдзауты алы фæлтæртæй. Уый у патриотон хъомылад, – загъта Дзанайты Марк.
Сæрмагонд æфсæддон операцийы ветеранты ассоциацийы сæрдар Хъесаты Вадим фæсидтис фæсивæдмæ, цæмæй ахуырмæ тырной, сæ рæстæг пайдаджынæй æрвитой. «Давид æмæ иннæ лæппуты фæндыдаид, цæмæй сымах амондджын уат, уæ митæ, уæ хъуыдытæ уой раст, зæрдæмæдзæугæ. Афтæ куы нæ уа, уæд сæ цард дзæгъæлы раттой. Хъæбатыртæ нæ мæлынц, уыдон немæ сты, цалынмæ сæ хъуыды кæнæм уæдмæ, – загъта Вадим. – Кæддæр скъола хъæлдзæг дзæнгæрæгæй царды уæрæх фæндагмæ афæндараст кодта йæ рауагъдонты. Уыдысты уæд амондджын, фæлæ сæ хъысмæт бæллиццаг нæ рауад. Мемориалон фæйнæ-джытæй нæм кæсынц ныр нæхи лæппутæ.
– Давид уыдис æппæты кæстæр уыдонæй. Сæ уарзон 38-æм скъолайы сын кæддæриддæр мысдзысты сæ ном. Ахуырадон процессы патриотон хъомылад ахсджиаг у. Ног фæлтæртæ хъуамæ зоной æмæ аргъ кæной æдзард хъæбатырты сгуыхтдзинæдтæн, – загъта скъолайы директор Сланты Мæдинæ.
Зæрдæмæхъаргæ зарæг Хортиты Давиды номыл акодта Езеты Игорь.
Цæгæраты Жаннæ
