Ирон æвзаджы педагогтæ æмæ хъомылгæнджытæн, Æрæфы районы Мæцутæйы скъола-интернаты бындурыл кæй сарæзтой, уыцы ахуырадон курсы сæйраг хæс уыд мадæлон æвзаджы ахуырады методикæ сног кæнын.
Нырыккон ахуырадон технологитæй пайда кæнын куыд хъæуы, уый ирон æвзаг æмæ литературæйы æртын педагогæн бацамыдтой. Ахуырадон курс дихгонд уыд мæнæ ахæм хæйттыл:
– лингводидактикон модуль – иронау дзургæйæ æмæ фысгæйæ, ахуырдзаутæ арæхдæр кæй æруадзынц, уыцы рæдыдтыты равзæрст;
– хъазæн техникæйæ практикум – рæвдауæндæтты хъомылгæнинæгтæ æмæ кæстæр скъоладзаутæ иронау цæмæй хорз дзурой, уымæн чи ахъаз кæны, уыцы ирон адæмон сфæлдыстадæй пайда кæнгæйæ, педагогтæ 15 сценарийæ фылдæр рахатыдысты;
– ахуырадон æрмæ-джытæ аразыны фæдыл мастер-класс программон темæтимæ баст чи у, ахуыргæнджытæ сахуыр сты ахæм бирæкъабазджын картæтæ æмæ стъолыл хъæзтытæ аразыныл;
– текстимæ куысты мадзал – канд æвзаг нæ, фæлæ культурæ дæр рахатынмæ арæзт чи у, бавдыстæуыд текст сындæг кæсыны хъуыддаджы ахæм фæзилæнтæ;
– нымæцон ифтонггæрзтæ – адæймаг кълас цæттæкæнынады къæпхæныл цæмæй сахуыр уа, ахæм фадатимæ интерактивон фæлтæрæнтæ аразынæн платформæтыл афæлгæст.
Ахуырадон курсы архайджытæ уæлдай фылдæр æргом аздæхтой дзурыны фæлтæрддзинад рабæрæг кæныны хъуыддагмæ: кары алыхуызон къордты сывæллæттæ дзурын куыд сахуыр сты, уый сбæлвырд кæнынæн чи ахъаз кæны, педагогтæ райстой ахæм чек-сыфтæ. Курсы архайæг педагогтæн районы историон бынæтты сарæзтой экскурситæ.
– Алы ахуыргæнæгмæ дæр канд теорион зонындзинæдтæ нæ, фæлæ практикон фæлтæрддзинад дæр цæмæй фæзына, уымæн чи ахъаз кæны, ахуырадон курс ахæм уагæй баххæст кодтам. Ацы æууæл нымайын курсы сæйраг бæрæггæнæныл, – зæгъы нæ республикæйы ахуырад æмæ наукæйы министрады национ ахуырады хайады хицау Солтанты Джульетæ.
Педагогтæ урокты пълантæ биноныг равзæрстой, стæй, скъолайæ иудадзыг архайæг лаборатори цæмæй рауайа, ахæм уынаффæ дæр рахастой. Проект æххæст кæндзысты æрвылаз, фæстæдæр та зонындзинæдты къæпхæн уæлдæргæнæг программæ фæуæрæх кæндзысты, æмæ афтæмæй уыдзæн ирон æвзаджы райрæзтмæ æргомздахæг фылдæр специалисттæ ахуырадон курсмæ æрбахоныны фадат.
Ахуырадон курс цæмæй нывыл уагæй ацæуа, проекты архайæг педагогтæ æмæ хъомылгæнджытæ уымæн фадæттæ саразæг районы администрацийы ахуырады управленийы хицау Хъæбæлоты Залим æмæ скъолайы директор Хайманты Мæирбегæн бузныг зæгъынц.
Иумæйаг хъарутæй ирон æвзаджы ахуырады хуыздæр æгъдæуттæ бахъахъхъæнын кæй бантысдзæн, ууыл зæрдæ дарæн ис.
РЦИ-Аланийы Ахуырад æмæ наукæйы министрады пресс-службæ
