Цæгат Ирыстоны Медицинон академийы специалистты къорд кусæг балцы ацыдысты Хуссар Ирыстонмæ, цæмæй Цхинвалы сывæллæтты поликлиникæ æмæ районты медицинон кусæндæтты лæвар консультацитæ саразой.
Цæгат Ирыстоны Медицинон академийы сывæллæтты невролог Къуымахты Амирхан куыд фæбæрæг кодта, уымæ гæсгæ адæммæ каст цæуы пъланмæ гæсгæ, куыд æмбæлы, афтæ сабыргай, æнæкъуыхцытæй. Ныридæгæн уал дзы уæззау низимæ рынчынтæ нæ разынд. Фыццаг боны æмбисмæ уал сæ бабæрæг кодтой 13 пациенты.
– Цалдæрæн дзы, се ’нæниздзинад сбæрæг кæнынæн снысан кодтам уæлæмхасæн мадзæлттæ ацæуын, иннæ къордæн та – Дзæуджыхъæуы республикон рынчындоны æрхуыссын æмæ бæлвырд стационарон медицинон æххуыс райсын, аннæты та бахъæудзæн невролоджы цæстдард, – радзырдта нын Къуымахы-фырт.
Йæ ныхасмæ гæсгæ, консультацитæм фылдæр æрбацæуынц хистæр кълæсты сывæллæттæ. Арæхдæр сæм цы низтæ рахатæм, уыдон сты невроз, стресс, æнæрæвдыдæй баззайыны синдром, æмæ ма ныхасы æмæ архайды фæстиат.
Невролог фæбæрæг кодта, сывæллæттимæ кусгæйæ, кæй хъæуы уæлдай комплексон методикæ логопед, дефектолог, психолог æмæ æндæр специалистты иумæйаг архайдимæ. Куыд загъта, афтæмæй ныртæккæйы сывæллæттæ уæлдай змæлагдæр сты, ахуыргæнæндæтты æмæ сæ алыварс алфамбылайы фылдæр æппæрццæг фактортæ, стресс æмæ æндæр ныхылдтытæ кæй исынц, уый аххосæй.
Уый тыххæй невролог ныййарджытæн фæдзæхсы, сывæллонæн психологон æгъдауæй сабыр, æмбæлгæ уавæртæ саразын.
– Фыццаджыдæр, ныййарæг хъуамæ йе ’ргом аздаха, сывæллон æрæгмæ кæй сдзырдта, уымæ. Уымæн æмæ афæдздзыд сывæллон хъуамæ ахæм хуымæтæг дзырдтæ «мамæ» æмæ «папæ» дзурын зона – загъта Къуымахты Амирхан.
Фæсивæд ныртæккæ гаджеттæ æмæ телефонты амæттаг кæй баисты, уый тыххæй специалист ныййарджытæн фæдзæхсы, сывæллæттимæ сабырæй дзурын, хæдзары дæр сын æхсызгон уавæртæ саразын.
ХЪОЙБАЙТЫ Галинæ
