Æппæтадæмон фестиваль «Ирон фæндыр»-ы бындурыл нæ республикæйы сывæллæтты журнал «Ногдзау» сарæзта Цæцæны Республикæйы Наукæты академийы президент Аламахад Ельсаевы чиныджы презентаци.
– Махæн, сывæллæтты журнал «Ногдзау»-ы кусджытæн, ацы мадзалы фæрцы фадат фæци сабиты цæстæнгасæй ахуыргонды философон фæллоймæ арфдæр бакæсынæн. Чиныг «Стержень» Цæриаты Валерийы тæлмацæй у, чиныгкæсæгимæ царды сæйрагдæр: адæммæ уарзондзинад, хæрзæгъдау æмæ удхъомысыл кæм цæуы ныхас, ахæм уацмыс. Æмæ мах дæр фæндыд, уыцы миниуджыты тыххæй куыд фехъусой стырæй-чысылæй. Залы уæвæг адæмæн дзырд æмæ музыкæйы æцæг бæрæгбон уыдис. Уæлдай стырдæр тæлмæнтимæ мæ фæнды фæбæрæг кæнын мадзалы нæ республикæйы Адæмон артисткæ Цæрикъаты Риммæйы архайд. Йæ аивад æмæ æртисты дæсныйад цыма презентацимæ хаст чиныг «Стержень»-имæ сиу сты, афтæ кастис алкæмæ дæр. Сæрæнæй программæйы архайдтой Дзæуджыхъæуы 3-æм скъолайы 8 къласы ахуырдзаутæ. Æвзонг кæсджытæ сæ аивады фæрцы равдыстой, Аламахад Ельсаевы философи æрыгон фæлтæрмæ хæстæгдæр кæй у, мадæлон æвзагыл куы азæлы, уæд. Мадзалы архайджыты зæрдæтæ сæ аивадæй бахъарм кодтой адæмон ансамбль «Æртхурон»-ы солисттæ æмæ курдиатджын музыкант Хуымарты Дзамболат. Уæлдай æхсызгондæр уыдис, Цæгат Ирыстоны Медицинон академийы чи ахуыр кæны, уыцы цæцæйнаг студентты фенд сæ разамонæг Моргуаты Фатимæимæ. Сæ архайд сси, Ельсаевы сфæлдыстадæн арæнтæ кæй нæй, хæлардзинады ‘взагыл адæмты кæй иу кæны, ахæм символ. Цымыдисаг уыдысты не ‘взонг «стъалытæ» Хава Дикаева æмæ Амина Джангазиевайы архайд дæр. Æппæты хъармдæр ныхæстæ та мæ фæнды зæгъын Танделаты Розæ æмæ йе ‘сфæлдыстадон иугонд «Талатæ»-йы хъомылгæнинæгтæн. Уыдон уазджытæн бацæттæ кодтой, сæхи къухæй конд мæсыджы хуызы лæвæрттæ. Уыцы сувениртæ канд æхсызгон сюрпризтæ нæ уыдысты, фæлæ Аламахад Ельсаевы сфæлдыстад аргъгæнджытæн се ‘ппæтæн дæр зæрдиаг хъарм салам.
Презентаци рауад цымыдисаг æмæ мидисджын. Федтам, «Стержень» хуымæтæг чиныг кæй нæу, фæлæ нæ, иу чи кæны,сфæлдыстады уæлтæмæны хъарутæ нын чи дæтты, ахæм хъапп. Бузныг се ‘ппæтæн дæр, уыцы бон немæ чи уыд, уыдонæн. Хицæн арфæ та кæнын нæ фестиваль «Осетинская лира»-йæн, ахæм егъау культурон цауы иу хай суæвыны фадат нын кæй ратта.
Сæлбиты Дианæ,
журнал «Ногдзау»-ы сæйраг редактор
