Дзæуджыхъæуы 11-æм скъола чысыл нæу, ис дзы 1300 ахуыргæнинаджы. Ам ахуыр æмæ хъомыладон куыст цæуы рæстæджы домæнтæм гæсгæ. Ацы скъолайы ирон æвзаг ахуыр кæныны хъуыддаг у ахсджиаг, иннæ предметтæй йæм къаддæр хъусдард нæ цæуы.
Уый, фыццаджыдæр, у скъолайы директор Хетæгкаты Зæлинæйы, стæй, кæй зæгъын æй хъæуы, ирон æвзаг æмæ литературæйы ахуыргæнджыты фæрцы. Ирон адæм зæдтæм куыд фæкувынц, куыд сæ нымайынц, куыд сын æгъдау кæнынц, афтæ кувынц æмæ аргъ кæнынц нæ зындгонд ирон æвзаг æмæ литературæйы бындурæвæрæг Хетæгкаты Къостайæн дæр.
Ацы аз Къостайы райгуырдыл сæххæст 167 азы. Мах, 11-æм скъолайы ахуыргæнджытæ æмæ ахуырдзаутæ, тынг зæрдиагæй нæхи бацæттæ кодтам ацы бонмæ. Скъоладзаутæ тынг цымыдисæй архайдтой. Сывæллæттæй чи кафгæ кодта, чи – æмдзæвгæ дзырдта, чи та – чысыл сценкæты архайдта, бæрæг уыд скъоладзаутæн сæ цæстыты æрттывдæй, куыд арф æмæ зæрдиаг бынаты æвæрд у сæ зæрдæты Къоста.
Дыккаг бон та нæ скъолайы ахуырдзаутæ сæйраг парчы равдыстой Къостайы удæгас (живые) портреттæ. Адæм сæм тынг цымыдисæй кастысты æмæ семæ сæ къамтæ истой.
Мæн уырны, Къостайы стъалы ирон адæмы зæрдæты кæй никуы бамынæг уыдзæн. Цæр æмæ нын æрттив адæмы зæрдæты æнусмæ, Къоста!
Санахъоты Зæлинæ,
11-æм скъолайы ирон æвзаг æмæ литературæйы ахуыргæнæг
