РЦИ-Аланийы æнæниздзинад хъахъхъæнынады министр Митциты Астан ацы бонты кусæг балцы ис Мæскуыйы. РЦИ-Аланийы Сæргълæууæг Сергей Меняйло министрæн бахæс кодта, Цæгат Ирыстоны æнæниздзинад хъахъхъæныны къабазы рæзты мадзæлттæн нæ бæстæйы сæйраг сахары фембæлдтытæ саразын. Уыцы мадзæлттæй иу ацыд Мæскуыйы нейрохирургон центры.
– Центры разамонæг, не ‘мзæххон, дунеон нейрохирургийы зындгонд дохтыр Дзукъаты Дмитри нæ базонгæ кодта куыстуаты архайдимæ. Дзукъайы-фырт УФ-йы сгуыхт дохтыр у, нæ бæстæйы медицинон преми «Призвание»-йы лауреат. Йæ разамындæй Центр сси нæ бæстæйы хуыздæртæй иу, ардæм фæлтæрддзинад райсынмæ æрцæуынц Уæрæсейы алы рæттæй хирургтæ. Дмитри кæны уæззау операцитæ, мингай рынчынтæн се ‘нæниздзинад фæстæмæ раздахы, суанг олимпаг чемпионтæн дæр. Уæлдай тынгдæр тæлмæнтæ мæ зæрдæйы ныууагъта, дохтыртæ сæ дæсныйадыл нырыккон уавæрты кæм кусынц, уыцы тренинг-центр. Нæ балц хуымæтæджы нæ уыд. Мæхи цæстæй федтон, куыд хъуамæ арæзт цæуа бæрзонд технологон æххуыс æмæ хирургты цæттæдзинады системæ. Нæ нысан у бацархайын, цæмæй, ахæм тренировкæтæ кæнæн центртæ æмæ раззагдæр методикæтæ фæзыной Цæгат Ирыстоны дæр. Бузныг зæгъын Дзукъаты Дмитрийæн йæ æргом ахаст, æмæ, аргъ скæнæн кæмæн нæй, уыцы фæлтæрддзинады тыххæй. Бузныг зæгъын нæ республикæйы Сæргълæууæгæн дæр, ахæм хъæппæристæн нын æххуысы æнцой кæй фæлæууы, æнæниздзинады къабазмæ фылдæр йе ‘ргом кæй здахы, уый фæрцы нын фадат ис æппæты хуыздæртæм ахуыр кæнын æмæ нæ республикæйы медицинæйы рæзтыл кусын, – загъта Митциты Астан.
САУТÆТЫ Тамилæ
