Цӕгат Ирыстон йӕхи цӕттӕ кӕнын райдыдта ацы дӕсазоны сӕйраг статистикон цаумӕ — Адӕмы ӕппӕтуӕрӕсеон сфыстмӕ.
Бӕстӕйы историйы фыццаг хатт сфыст ацӕудзӕн электрон хуызы. Куыдфӕстӕмӕ сфысты гӕххӕттын сыфтӕ ферох кӕндзыстӕм. Гӕнӕн куы нӕ уа, уӕд пайдагонд цӕудзӕн гӕххӕттын сыфтӕй дӕр. Адӕм кӕуыл сахуыр сты, ахӕм гӕххӕттын анкетӕты бӕсты сфыст ӕххӕстгӕнджытӕн ратдзысты планшеттӕ. Уыдоны фӕрцы уыдзӕн ӕмбырдгонд бӕрӕггӕнӕнтӕ рӕвдз ӕрвитӕн ӕмӕ онлайнмӕ гӕсгӕ сфыстмӕ цӕст дарӕн.
— Адӕмӕн фыццаг хатт уыдзӕн Интернеты хызӕджы сфысты сыфтӕм сӕхи ӕмӕ сӕ бинойнӕгты бӕрӕггӕнӕнтӕ бахӕссыны фадат. Ацы хъуыддаг бакӕнынӕн адӕймаджы хӕс у хыгъдон фыст паддзахадон лӕггӕдты порталы дарын. Интернет-сфыстимӕ уыцы-иу рӕстӕг кусдзысты сфыст ӕххӕстгӕнджытӕ дӕр, — загъта «Росстат»-ы управленийы хицау Светланӕ Никитина.
Адӕмы ӕппӕтуӕрӕсеон сфыст райдайдзӕн иннӕ аз 1 октябры ӕмӕ бӕстӕйы фылдӕр регионты ахӕсдзӕн иу мӕй. Цӕгат Ирыстоны кусдзӕн 100 адӕймагӕй фылдӕр (ацы адӕм иннӕтӕй хицӕн кӕндзысты сӕрмагонд уӕлӕдарӕсӕй).
— Цӕгат Ирыстоны сфыст ӕххӕстгӕнджытӕм цӕуын райдыдтой ӕвдисӕндартӕ. Сфысты эмблемӕимӕ райстам хъуырбӕттӕнтӕ ӕмӕ пъартфелтӕ дӕр. Ацы эмблемӕтӕм гӕсгӕ сфыст ӕххӕстгӕнджытӕн базонӕн уыдзӕн ӕнцонӕй. Сфыст ӕххӕстгӕнӕгмӕ уыдзӕн ӕвдисӕндар гербон мыхуыр ӕмӕ нӕ разамонӕджы къухӕвӕрдимӕ, — бамбарын кодта паддзахадон статистикӕйы федералон службӕйы цӕгатирыстойнаг территорион оргӕны разамонӕг Олег Быкадоров.
