Цӕй амондджын сты уыцы хистӕртӕ, сӕ фарны хъуыддӕгтӕ кӕстӕртӕ царды рӕсугъдӕй дарддӕр кӕмӕн ахӕссынц. Йӕ рӕстӕджы Ирыстоны зындгонд уыд Хъӕдгӕроны кафты ӕмӕ зарды фольклорон ансамбл. Чи дзы архайдта, уыцы карджын лӕгтӕ ӕмӕ сылгоймӕгтӕ цал ӕмӕ цал хатты ӕвдыстой сӕ аивад нӕ бӕстӕйы ӕмӕ ма суанг фӕсарӕнты дӕр. Рацарӕзты дуджы ацы зындгонд аивадон артдзӕсты архайд фӕмынӕг. Хъӕдгӕройнӕгты уый хуымӕтӕджы сагъӕсы не ‘фтыдта.
Абон Хъӕдгӕроны Культурӕйы хӕдзары кусы цалдӕр аивадон къорды. Ӕмӕ дзы разӕнгардӕй архайынц хъӕуы алы кары цӕрджытӕ. Сӕ фылдӕр сты ахуырдзау фӕсивӕд. Нӕ хорз ӕгъдӕуттӕ, традицитӕ ӕмӕ кадджын ирон бӕрӕгбӕттӕ рох кӕнын нӕ уадзынц. Ӕрӕджы та уыдоныл бафтыд ног сфӕлдыстадон коллектив — адӕмон вокалон- инструменталон къорд «Хъуыбады».
Культурӕйы хӕдзары директор Баситы Эльзӕ ӕмӕ йе ‘мкусджытӕ Балаты Эльбрус ӕмӕ Кучиты-Мецъыты Джульеттӕ, аивадон разамонӕг Дзахоты Алан, сӕ алыварс ӕрбамбырд кодтой ирон аивадӕн, зарӕг ӕмӕ инструменталон музыкӕйӕн стыр аргъ чи кӕны, йӕ риуы курдиаты ӕнӕмӕлгӕ зынг кӕмӕн судзы, сӕ цӕстыты цӕхӕрӕй аивадмӕ уарзты тӕлмӕнтӕ кӕмӕн зыны, ахӕм хӕдахуыр ӕмӕ профессионалон музыкантты. Фӕндырдзӕгъдджытӕ Рӕмонты Эльзӕ ӕмӕ Реуазты Ларисӕ, кафты ансамблы разамонӕг Гӕззаты Давид, доулӕй цӕгъдӕг Пелиты Дато. Сӕ фарсмӕ ӕрбалӕууыдысты хӕдахуыр, фӕлӕ ӕрдзон курдиатӕй хайджын адӕм, сӕ уды бӕрц уарзынц ирон зарӕг ӕмӕ музыкалон аивад Гугкаты Хъазыбег, Гогаты Ахтемыр, Чъерджиаты Ритӕ, Цӕргӕсты Зӕлинӕ ӕмӕ Гӕлӕбаты Валентинӕ, Чехойты Мурат ӕмӕ Гугкаты Каринӕ. Сӕ курдиат дисы бафтыдта суанг «РусГидро»-йы кусджыты. Уыдонӕй ныр цалдӕр лӕппуйы сты ацы къорды архайджытӕ.
Ныридӕгӕн хъӕдгӕройнаг курдиатджын зарӕггӕнджытӕн ӕмӕ музыкалон инструменттӕй цӕгъдджыты арӕхстдзинадӕн ӕмдзӕгъд кодтой ӕрыдоны районы ӕмӕ республикӕйы аивадуарзджытӕ. Ансамблы уӕнгтӕ сӕ репертуармӕ цы уацмыстӕ бахастой ӕмӕ куыд аивӕй райхъуысынц, ууыл сӕ цӕст ӕрӕвӕрдтой хихъӕппӕрисадон аивады республикон конкурс «Иры фарн»-ы жюрийы уӕнгтӕ. Дисы сӕ бафтыдтой сӕ зард ӕмӕ цагъды ӕмзӕлдзинадӕй. Ӕмӕ сын саккаг кодтой фыццаг бынат. Уый у ацы ӕрыгон коллективы фыццаг зынгӕ уӕлахиз.
— Нӕ куысты сӕйрагдӕрыл нымайӕм адӕмы ‘хсӕн культурӕ парахат кӕнын, ӕхсызгондзинад хӕссын, фӕсивӕдӕн сӕ курдиат сфӕлдыстадмӕ раргом кӕнын. Ирон зарӕггӕнджыты ӕмӕ адӕмон инструментты къордтӕ сӕмбырд кӕнын уыд мӕ бирӕ азты стыр бӕллиц. Ӕнцонӕй къухы ницы бафты. Нӕ ӕнгом коллективы архайд, нысанмӕ тырнындзинад, курдиат ӕмӕ аивадмӕ уарзондзинад, уыдысты нӕ разӕнгардгӕнджытӕ, — зӕгъы Культурӕйы хӕдзары директор Баситы Эльзӕ, — фӕлӕ ӕрмӕст тырнындзинад фаг нӕ уыдаид, нӕ уӕлахизмӕ йӕ аккаг ӕвӕрӕн ӕнӕххӕст бӕрнондзинады ӕхсӕнад «Хъӕдгӕрон-Агро»-йы генералон директор, хӕрзаудӕг адӕймаг Хъазиты Тамерлан куынӕ бахастаид, уӕд. Уый нӕ ног аивадон коллективӕн балӕвар кодта ӕртӕ далафӕндыры. Уӕдӕ ӕнӕзӕгъгӕ нӕй, ӕрыдоны районы бынӕттон хиуынаффӕйады администрацийы культурӕйы управленийы хицау Ингӕ Ковтуны тыххӕй, алы хъуыддаджы дӕр нӕ фарсмӕ хионау ӕрбалӕууы.
Вокалон-инструменталон къорды разамонӕг Балаты Эльбрус архайы, рохуаты цы ирон зарджытӕ аззад , уыдон репертуармӕ бахӕссыныл. «Хъуыбады»-йы фыццаг ӕнтыст уыд республикон конкурс «Иры фарн»-ы, уый сын дарддӕр ноджы стырдӕр ӕнтыстытӕм разӕнгардгӕнӕг кӕй уыдзӕн, ууыл дызӕрдыг нӕ кӕнӕм.
Гугкаты Жаннӕ
