Нӕ фыдӕлтӕм баззад ӕмбисонд, ӕнӕ хӕргӕйӕ, ӕнӕ даргӕйӕ ничи цӕры, зӕгъгӕ. Фӕлӕ хӕрынӕн дӕр ӕмӕ дарынӕн дӕр уыд ӕфсон, рӕстӕг ӕмӕ фадат.
Сӕ царды фылдӕр хай уӕззау куыстыл хӕст уӕвгӕйӕ, сӕ хӕринаг дӕр уыд ахадгӕ. Фӕлӕ сӕ рог куыстыты рӕстӕг хъуыд ӕнцонтайӕн хӕринӕгтӕ. Дыргътӕ, халсартӕ ӕмӕ кӕрдӕджытӕ адӕймагӕн пайда кӕй сты, йӕ тыхыл ын тых кӕй ӕфтауынц, уый зыдтой ӕмӕ уыцы дыргътӕй, кӕрдӕджытӕй, халсартӕй, ӕхсырӕй кодтой алыхуызон хӕринӕгтӕ. Фосдарыны куыст кӕй кодтой, уый дӕр ирдӕй зыны нӕ национ хӕринӕгтыл. Фыдӕлты хӕлцады сӕйрагдӕр хуызтӕн ма бынат ис суанг Нарты кадджыты, таурӕгъты ӕмӕ ӕмбисӕндты дӕр. Зӕгъӕм, баззад ахӕм хъуыды: «Цӕкуы-мӕкуы — хохмӕ, кас — къӕсӕрмӕ, дзыкка — ӕфцӕгмӕ”.
Ирон хӕринӕгтӕ куыд цӕттӕгӕнгӕ сты, уый цымыдис кӕны абоны фӕлтӕрты дӕр. Уый нымайгӕйӕ, чиныгуадзӕн «Ир» рауагъта дзыппыдаргӕ чысыл чиныг «Осетинская кухня». Йӕ аразӕг у Цуциты Замирӕ. Цӕмӕй, хӕринаг куыд цӕттӕгӕнгӕ у, уый ӕнцондӕрӕй базонӕн уа, уый тыххӕй чиныг дихгонд у дӕс сӕргондыл: уазал хӕринӕгтӕ, цӕхдӕттӕ, хъӕрмхуыппытӕ, стуры фыдӕй хӕринӕгтӕ, маргъы фыдӕй хӕринӕгтӕ, ӕхсырӕй конд хӕринӕгтӕ, халсартӕй конд хӕринӕгтӕ, ссадӕй конд хӕринӕгтӕ, нуазинӕгтӕ. Хицӕн сӕргондмӕ та хаст ӕрцыд, нӕ фыдӕлтӕ цыхт ӕмӕ царв куыд кодтой, уый. Цы хъацӕнтӕ сӕм ӕфтыдтой, уый тыххӕй дзы ис бӕлвырд ӕрмӕг.
Зӕгъӕм, стуры фыды бас, фысы фыд картофимӕ, айчы бас, цырд карк (зажаренный), роды фыдӕй духовкӕйы фых лывзӕ, цырд хъаз картофимӕ, къуымӕл, бӕгӕны, зормӕ, ӕмыс, задын, дзыкка, сир ӕмӕ ӕндӕр хӕринӕгтӕ куыд цӕттӕгӕнгӕ сты, уый базондзыстут ацы чиныгӕй. Ӕдӕппӕтӕй дзы ис 50 хӕринагӕй ӕмӕ нуазинагӕй фылдӕр. Чиныг ӕддаг бакастӕй куыд аив у, афтӕ мидисӕй дӕр хъӕздыг рауад. Йӕ саразӕг спайда кодта, амӕй размӕ ирон хӕринӕгты тыххӕй цы чингуытӕ ӕмӕ буклеттӕ арӕзт ӕрцыд, уыдонӕй дӕр. Чиныгмӕ цы рецепттӕ хаст ӕрцыд, уыдонӕй уӕлдай ма дзы ис хӕринӕгтӕ ӕмӕ нуазинӕгты хуызистытӕ.
Чиныг «Осетинская кухня» хорз ахъаз у хӕдзары ӕфсинтӕн, цӕлгӕнӕнты, кафеты, ресторанты кусджытӕн. Ис ӕй зӕрдиаг ӕмӕ ӕхсызгонӕй балӕвар кӕнӕн, уӕ зӕрдӕмӕ уӕлдай хӕстӕгдӕр чи у, уыцы адӕмӕн ӕмӕ, Ирыстонмӕ чи цӕуы, уыцы уазджытӕн, нӕ хӕринӕгтӕ куыд цӕттӕгӕнгӕ сты, уый стыр ӕхсызгонӕй базонын кӕй фӕнды, се ‘рцӕттӕ кӕнынмӕ чи арӕхсы, уыцы адӕмӕн се ‘ппӕтӕн дӕр.
Гасанты Валери
