Национ наукон библиотекæйы ивгъуыд цыппæрæмы байгом зындгонд нывгæнæг Каджаты Вадимы аивадон куыстыты равдыст.
Уый у Бетъырбухы нывгæнынады скъолайы курдиатджындæр ирон нывгæнджытæй иу. Сфæлдыстады йе ‘ргом фылдæр здахы нæ фыдæлты царды нывтæ, Алайнаг паддзæхтæ æмæ фæтæгты фæлгонцтæ ныв кæнынмæ. Йæ куыстытæ йын фенæн ис Ирыстоны, Мæскуыйы, Бетъырбухы, Европæйаг бирæ бæстæты музейты æмæ хицæн адæймæгты коллекциты.
Библиотекæйы цы равдыст сарæзта, уым та фенæн ис Чырыстон дин райсыны фæстæ Алайнаг паддзахады æфсæддон æмæ паддзахадон рæзтыл тынг йæ дардмæуынаг зондæй, тых æмæ æрхъуыдыйæ йæ адæмæн ныфсæвæрæг æмæ раздзæуæг чи уыд, уыцы паддзæхты æмæ æфсæддон балхонты фæлгонцтæй Бузыккы, Константины, Ос-Бæгъатыры, Урдуры, Дорголелы, Худаны сурæттæ. Стыр композицион аивадон куыст «Аланты бæрæгбон»
Равдыст гом кæныны кадджын æмбырдмæ æрбацыдысты æмæ Каджаты Вадимы нываивадон æрмдзæфы тыххæй сæ хъуыдытæ загътой æмæ йын зæрдиаг арфæтæ ракодтой РЦИ-Аланийы культурæйы министр Галазты Эдуард, йæ хæдивæг Хъуыссæты Зæлинæ, нæ республикæйы Нывгæнджыты цæдисы сæрдар Мæргъиты Таймураз, иерей Хъуысаты Игор, протоиерей Остъаты Тимофей, аивадуарзджытæ, нывгæнæджы хиуæттæ æмæ хæстæджытæ, студенттæ æмæ скъоладзаутæ.
Ацы равдыст нывгæнæг Каджаты Вадим сарæзта Аланыстоныл саргъуыды 1100 азы бонмæ. Йæ нывты цы рухс æмæ арф хъуыдытæ ис, уый тыххæй сæ хъуыдытæ загътой аивадиртасæг Гæздæнты Зарæ, УФ-йы адæмон нывгæнджытæ Бедойты Шалва æмæ Челæхсаты Магрез, нæ республикæйы адæмон поэтессæ Гуырдзыбеты Иринæ.
Солтанаты Анвар
