25-30 сентябрмæ Дзæуджыхъæуы, сывæллæтты республикон-клиникон рынчындоны бындурыл, æрдзæй рахæсгæ былтæ æмæ комарынгы аипдзинад кæмæ ис, уыцы сывæллæттæн нæ бæстæйы хуыздæр дæсны специалисттæ дохтыртæ-бархионтæ кæндзысты лæвар операцитæ. Ацы командæ ахæм хæрзаудæн акцийы фæрцы 40 операцийы скæндзысты, 100 сывæллоны уавæрмæ та бæстон æркæсдзысты æмæ сын консультацитæ ратдзысты.
Хæрзаудæн фонд «Операция Улыбка» ацы мадзал аразы ООО компаниты къорд «Бавари»-йы æххуысæй. Операцитæм сывæллæтты та æвзардзæн дунейы зындгонд дохтыр, хæрзаудæг æмæ «Операция Улыбка»-йы фонды бархион Хасан Баиев.
Æрдзæй рахæсгæ былтæ æмæ комарынгы аипдзинадимæ сывæллæттæн медицинон хæрзаудæн акци æрвылаздæр Цæгат Кавказы æмæ Уæрæсейы иннæ регионты ацæуы бынæттон æнæниздзинадхъахъхъæнынады министрадтимæ бадзырд бафыссыны бындурыл. Бæрзонд квалификаци кæмæ ис,уыцы дохтыртæ-бархионтæ къуырийы дæргъы консультаци æмæ операцитæ кæнынц сæ чысыл пациенттæн, цæмæй сывæллæттæн æххæстæй сæ бон уа хæрын, дзурын, æхсæнады хи нывыл уагæй æнкъарын æмæ сæ бинонты ‘хсæн æмбæлгæ уавæрты цæрын.
Медицинон хæрзаудæн акци «Операция Улыбка» Уæрæсейы сфидар кодтой 1995 азы. Ныр, 25 азы Уæрæсейы регионтæм ласы нæ бæстæйы æмæ дунейы хуыздæр дохтырты: анестезиологты, медицинон хоты, педиатрты, логопедты, психологты æмæ æндæр специалистты.
Æппæт дохтыртæ дæр, уæлдæр амынд къордмæ бахауыны размæ уал ацæуынц аккредитаци. Акцийы рæстæг уыдон кусынц лæвар, райсынц отпуск, цæмæй ацæуой регионтæм сывæллæтты дзæбæх кæнынмæ. Бынæттон специалисттæ та архайынц акци бацæттæ кæныны хъуыддаджы, кæрæдзийы фæлтæрддзинадæй пайда кæныныл æмæ операциты фæстæ пациенттæм цæстдарыны мадзæлтты.
Нæ уацхæссæг
