Дзæуджыхъæу, мæ Ирыстоны зæрдæ, мæ уарзон горæт! Ды дæ мæ удæнцойад, сæрыстырдзинад.
Кады аллейæ, Барбашовы фæз, нæ разагъды лæгты номхæссæг уæрæх æмæ сыгъдæг уынгтæ, сæйрагдæр та — нæ адæм. Фæллойуарзаг, сыгъдæгзæрдæ, уазæгыл æнувыд, йе ‘гъдау йæ разæй кæмæн цæуы, фыдæлты кад æмæ намыс дæлæмæ чи нæ уадзы, Райгуырæн бæстæйы сæраппонд йæ цард радтынмæ дæр цæттæ чи у, æгадæй цæрыны бæсты кадимæ мæлæт чи ‘взары. Уымæн æвдисæн, нæ сагсур фæсивæды хæствæллад уæнгтæ кæм æрæнцадысты, уыцы уæлмæрд.
Лæууын цæнгæт хидыл. Мæ цæстæнгас ахæссын мæ алыварс æвæджиауы рæсугъд хæхтыл, алæмæты улæфæн бынæттыл Терчы былгæрон… Кæддæр-иу Къоста дæр ам бадтис Поповты хæдзары акомкоммæ. Уæртæ уым та Санаты Ибрагимы хæдзары зæрдæбын ныхас кодтой горæты интеллигенцийы минæвæрттæ…
Æрцæуын Сабырдзинады проспектыл. Алы хæдзарæн дæр дзы — йæхи истори. Бирæтæ дзы — Къостайы номимæ баст. Бузныг кæддæры къупецæгтæн, махæн ахæм, архитектурон æгъдауæй æххæст, бынтæ чи ныууагъта.
Цæуын, æнцонæй мæ риуыдзаг улæфын. Хъусын музыкæйы æхсызгон зæлтæм. Мæ зæрдæ сæрыстырдзинадæй дзаг у. Цæуын мæ горæты уынгты, фыццаг хатт боны рухс кæм федтон, фыццаг къахдзæфтæ кæм акодтон, уым. Уарзын дæ æмæ уарздзынæн, цыфæнды хъæздыг æмæ рæсугъд горæттæ куы фенон, уæддæр. Мæ зæрдæйы арфы кæддæриддæр ды уыдзынæ. Уымæн æмæ мæн дæ! Æз та — дæу! Дæ хъæбул. Хъæлæсыдзаг мæ фæнды ныхъхъæр кæнын: «Æз уарзын Дзæуджыхъæу!».
Цæр мын æнусты, дидинæг кал, мæ уарзон горæт!
Косты Сабинæ,
Дзæуджыхъæуы 18-æм скъолайы
9-æм къласы ахуыргæнинаг
