Монголийы арæнхъахъхъæнæн къордтæй иуы фæзуаты кадджын уавæры байгом кодтой Советон Цæдисы дыууæ хатты Хъæбатыр, Монголы Адæмон Республикæйы Хъæбатыр, æфсады инæлар Плиты Иссæйы цыртдзæвæн. Уый тыххæй фехъусын кодта РЦИ-Аланийы Сæргълæууæг Сергей Меняйло.
1945 азы Советон-япойнаг хæсты рæстæг севетон хæстон разамонæг команды кодта Забайкальейы фронты иумæйаг советон-монгойлаг бæхджын-механизацигонд æфсæдты къордæн.
– Иссæйы ном Монголийы хорз зонынц, сæ зæрдыл дарынц æмæ йын нæ рох кæнынц йе сгуыхтдзинæдтæ. Мах сæрыстыр стæм нæ кадджын æмзæххонæй, æмæ йын Ирыстонæй дард ран дæр йæ номæн стыр аргъ кæй кæнынц, уымæй, – фæбæрæг кодта Сергей Меняйло.
Республикæйы разамонæг ма нын нæ зæрдыл æрлæууын кодта, ацы цыртдзæвæн зындгонд хæстон разамонæгæн Монголийы зæххыл фыццаг кæй нæу. Раздæр Плиты Иссæйы цыртдзæвæн сæвæрдтой Улан-Баторы Зайсан хохы сæр мемориалон комплексы. Уымæй уæлдай, инæлары ном хæссы сæйраг горæты 49-æм скъола. Йæ кæрты ис Плиты Иссæйы цыртдзæвæн дæр.
ХЪОЙБАЙТЫ Галинæ
