Уæрæсейы Рухсады министрады уынаффæйæ ног ахуыры аз скъоладзаутæн амонын райдайдзысты ног предмет «Духовно-нравственная культура России». Хъуыддаг æххæстгонд цæудзæн къæпхæнгай. Министрады специалисттæ ныридæгæн кусынц ахуыргæнæн чингуытыл.
Ног предмет 2026-2027 ахуыры азы дыккаг æмбисы амонын райдайдзысты 5-æм къласонтæн. Дарддæр, 2027-2028 ахуыры аз, предмет «Духовно-нравственная культура России» амонын райдайдзысты 6-æм æмæ 7-æм къласонтæн.
Ног предметы нысан у, уæрæсейаг адæймагæн ахсджиаг чи у, сыгъдæг удварны уыцы миниуджыты бындуртыл скъоладзауты хъомыл кæнын. Урочы рæстæг ахуырдзаутæ зонгæ кæндзысты, паддзахадон, æхсæнадон æмæ культурон архайджытæ, ахуыргæндтæ, æфсæддонтæ, сæрмагонд æфсæддон операцийы архайджытæ историон цаутæм цы цæстæй кæсынц æмæ сын цы аргъ кæнынц, уыимæ. Урок амондзысты историйы ахуыргæнджытæ.
***
5-æм кълæстæн фæкъаддæр кæндзысты англисаг æвзаджы уроктæ, ацы предмет сын уыдзæн къуыри дыууæ хатты. 6-7-æм кълæсты та англисаг æвзаджы урок уыдзæн æртæ хатты.
***
Ацы ахуыры азæй фæстæмæ Уæрæсейы æппæт скъолаты 5-9-æм кълæсты ахуырдзаутæ дæр истори ахуыр кæндзысты уыцы-иу программæмæ гæсгæ, стæй, уыцы программæйы цал ахуыры сахаты амынд ис, уыйбæрц. Сахæтты бæрцæн ивæн нæй, стæй программæмæ ивддзинæдтæ хæссыны бар дæр – афтæ. Уымæй уæлдай, 8-9-æм къласонтæн рауадздзысты, ноггонд чи æрцыд, паддзахадон ахæм ахуыргæнæн чингуытæ. Ногæй ма дыккаг æмæ æртыккаг хатт рауадздзысты чингуытæ хистæр æмæ астæуккаг скъолатæн. Алы къласы дæр цы темæтæ ахуыр кæндзысты, уыдон сты фидаргонд, æмæ сын ивыны бар нæй.
***
6-8-æм кълæсты программæтæй систой æхсæнадзонынады предмет (обществознание). Скъоладзаутæ йæ ахуыр кæнын райдайдзысты æрмæстдæр 9-æм къласæй (9-æм къласы – иу урок, 10-11-æм кълæсты та – дыууæ урочы).
***
Фыццагкъласонтæн ацы ахуыры азæй фæстæмæ официалон æгъдауæй, сфидаргонд уагæвæрдмæ гæсгæ, хæдзармæ куыст дæттæн нал уыдзæн.
***
Министрадæй куыд хъусын кæнынц, афтæмæй сæ пъланты ма ис 2027 азмæ хистæр къласонтæн химийæ, физикæ æмæ биологийæ ахуыргæнæн чингуытæ рауадзын. Уымæй уæлдай, куыст цæуы, агротехнологон кълæсты скъоладзауты кæуыл ахуыр кæнынц, уыцы аст къабазы ахуыргæнæн чиныг «Шаг в агротех»-ыл.
***
Бæрæг куыд у, афтæмæй иуцасдæр рæстæджы размæ министрад рухсмæ рахаста физкультурæйы иумæйаг паддзахадон ахуыргæнæн чиныг. Уыимæ, профилон кълæсты физкультурæ уыдзæн къуыри æртæ хатты, иннæ кълæсты та – къуыри дыууæ хатты. Уыимæ, алы скъолайæн дæр йæхи фæндонмæ гæсгæ ис уыцы уроктæ фæфылдæр кæныны бар.
***
Алы скъоладзауæн дæр йæхи фæндонмæ гæсгæ уыдзæн араббаг æвзаг, куыд дыккаг фæсарæйнаг æвзаг, уыцы хуызы йæ ахуыр кæныны тыххæй равзарыны бар.
***
Иннæ ногдзинад – ацы ног ахуыры аз скъолаты райдайдзысты æвæрын бæрæггæнæн, ахуырдзау йæхи куыд дары, уый тыххæй. Бæрæггæнæн æвæрдзæн ахуыргæнæг – къласы разамонæг.
