Ахуыры аз æрбахæстæг, æмæ базарты, дуканиты ныййарджытæ æмæ сабиты нымæц бонæй-бонмæ фылдæр кæны. Скъоламæ иу сывæллон бацæттæ кæнынæн гыццылдæр-гыццылдæр 30 мин сомы схардз кæнын кæй хъæуы, спортивон æмæ ивæн дарæс æмæ къахыдарæс нæ нымайгæйæ, ууыл æрæджы нæ газет фыста.
Ацы аз Дзæуджыхъæуы скъолаты къæсæрæй фыццæгæм кълæстæм бахиздзæн, горæты администрацийы пресс-службæ куыд фехъусын кодта, афтæмæй 3404 сабийы, уыдонæй 305 – сæрмагонд æфсæддон операцийы архайджыты сывæллæттæ.
Уæрæсейы Федерацийы Рухсады министрады уынаффæмæ гæсгæ, фыццæгæм кълæсты ахуырдзаутæн сæ ахуырадон фæтк фæлæмæгъдæр кæндзысты. Уроктæн сæ рæстæг уыдзæн æдæппæтæй 35 минуты, бон та сæм цыппар урокæй фылдæр хъуамæ ма уа. Ахæм фæтк фидаргонд æрцыд, цæмæй сывæллæттæ фæллайгæ ма кæной. Ахуыры дыккаг æрдæг урокты рæстæг фондз минуты фæфылдæр уыдзæн.
Æмæ ма ныййарджытæ æмæ сывæллæттæн æхсызгондзинад – афæдзы мидæг фыццæгæмкъласонтæн сæ фæлладуадзæн рæстæг уæлæмхасæн æнæхъæн къуыри фæдаргъдæр уыдзæн! Уыимæ сын ацы ахуыры азæй фæстæмæ хæдзармæ куыст дæр нал дæтдзысты.
БУТАТЫ Азæмæт
