Сывæллæтты республикон реабилитацион центр «Феникс»-ы сæрды иудадзыг дæр се ‘нæниздзинад фæфидар кæнынц Дзæуджыхъæу æмæ нæ республикæйы астæуккаг скъолаты ахуырдзаутæ. Сæ кар – авдæй æхсæрдæс азмæ.
Ам сын реабилитацион центры фæлтæрдджын дохтыртæ æмæ хъомылгæнджытæ се ‘нæниздзинад фидар кæнынæй уæлдай, зæрдиагæй бацархайынц, цæмæй кæстæртæ сæ удварн фæхъæздыгдæр кæной. Саразынц сын экскурситæ Дзæуджыхъæу æмæ нæ республикæйы зæрдылдарæн бынæттæм. Скъоладзаутæ мæй цалдæр хатты вæййынц Хетæгкаты Къостайы номыл Культурæ æмæ фæлладуадзæн парчы, сырддоны, Доны станцæ æмæ дендрарийы, бабæрæг кæнынц Сывæллæтты æфсæнвæндаг.
Афтæ ма æрæджы уыдысты дыууæ фæлтæрæй Хетæгкаты Къостайы номыл Ирон литературæйы музейы. Ацы артдзæсты хистæр зонадон кусджытæ Цхуырбаты Сергей æмæ ацы рæнхъыты автор фæсивæдæн радзырдтой музейы сарæзты историйы тыххæй. Базонгæ сæ кодтой йæ æртæ залы, ирон адæмон сфæлдыстад, фыссынад æмæ национ дзырдаивады дæсныты цард æмæ бирæвæрсыг сфæлдыстадимæ баст мидисджын æрмæджытимæ.
Скъоладзаутæ лектортæм лæвæрдтой алыхуызон мидисджын фæрстытæ, æмæ сын-иу музейы зонадон кусджытæ раттой бæстон дзуапп.
Музейы арфæтæ æмæ хъæппæристы чиныджы æвзонг уазджытæ ныффыстой зæрдиаг бузныджы ныхæстæ, зонадон кусджытæ сын цымыдисаг лекци кæй бакастысты, уый фæдыл.
ГАСАНТЫ Валери
