Уыд Республикæ Цæгат Ирыстон-Аланийы Парламенты Советы радон æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст закъонты проекттæм æмæ закъонæвæрынадон хъæппæристæм.
«Республикæ Цæгат Ирыстон-Аланийы паддзахадон хæрзиуджыты тыххæй» Республикæ Цæгат Ирыстон-Аланийы закъонтæм ивддзинæдтæ бахæссыны тыххæй» Республикæ Цæгат Ирыстон-Аланийы закъоны проект æркæсынмæ рахаста Парламенты наукæ, ахуырад, культурæ æмæ информацион политикæйы комитеты сæрдар Елена Князева. Документ амоны «Республикæ Цæгат Ирыстон-Аланийы кадджын ахуыргæнæджы» ном сфидар кæныны мадзæлттæ. Ацы ног хæрзиуæг лæвæрд цæудзæн, ахуырады къабазмæ стыр бавæрæн чи бахаста, стæй, ахуырады, наукæйы, йæ куысты мидæг чи басгуыхт, ахæм ахуыргæнинæгты чи бацæттæ кодта æмæ рауагъта, уыцы ахуыргæнджытæ æмæ хъомылгæнджытæ. Ныхас цы ног хæрзиуæгыл цæуы, уый лæвæрд цæудзæн, «РЦИ-Аланийы сгуыхт ахуыргæнæджы» ном кæнæ «РЦИ-Аланийы ахуырады къабазы кадджын кусæджы» ном чи хæссы, уыцы ахуыргæнджытæн. Æрмæст сын уыцы кадджын нæмттæ лæвæрд куы æрцыдысты, ууыл хъуамæ рацæуа æппынкъаддæр дæс азы.
Советы уæнгтæ байхъуыстой «Республикæ Цæгат Ирыстон-Аланийы базарадон архайд райрæзын кæныны тыххæй» Республикæ Цæгат Ирыстон-Аланийы Экономикон рæзты министрады хъусынгæнинагмæ. Раныхасгæнæг уыд экономикон рæзты министры хæстæ рæстæгмæ æххæстгæнæг Олег Быкадоров. Куыд загъта, афтæмæй базарад у экономикæйы ахсджиаг хай. Цæгат Ирыстоны мидбæстон иумæйаг продуктмæ йæ бавæрæн у 13 проценты, æмæ уый чысыл нæу. «Базарадон зилдух фарон нæ республикæйы уыд 215,8 миллиард сомы бæрц. Ацы азы фыццаг æмбисы та – 109 миллиард сомы. Нæ республикæйы базарадон архайд кæнынц: федералон гипермаркеттæ «Магнит», «Лента», «Светофор», «Лемана-про» æмæ «Метро», стæй республикон стыр дуканитæ «НАШ», «Гурман», «Деликат» æмæ «Стэйтон». Уымæй уæлдай, республикæйы ис дæс базаргæнæн бынаты, уыдонæй иу у хъæууонхæдзарадон базар», – загъта Олег Быкадоров.
Дарддæр ныхас цыд, базар кæныны бар цы ран нæй, ахæм бынæтты уæйгæнджыты ныхмæ горæты администраци цы мадзæлттæ аразы, ууыл, базаргæнæн бынæтты нымæц фылдæр кæныныл, маркетплейсты лæггæдтæ фылдæр кæныныл, картæтæ æмæ терминалты фæрцы фидыны æнцойдзинадыл æмæ уыцы хъуыддаг парахат кæныныл, базаргæнæн бынæттæ хъахъхъæнын æмæ æндæр фарстатыл.
Раныхасы фæдыл фарстытæ æмæ фиппаинæгтæ уыд Парламенты Сæрдары хæдивæг Дойаты Светланæмæ, депутаттæ Джиоты Георги æмæ Черчесты Асланмæ.
Фарстайы фæдыл æмдоклад скодта Парламенты промышленность, транспорт, бастдзинад æмæ амалхъомады комитеты сæрдар Киситы Мурат.
Парламенты национ политикæйы æмæ фæсивæды хъуыддæгты фæдыл комитеты сæрдар Джиоты Георги æркæсынмæ рахаста «Республикæ Цæгат Ирыстон-Аланийы паддзахадон æвзæгты тыххæй» Республикæ Цæгат Ирыстон-Аланийы закъоны проект. Документ ацыд æхсæнадон байхъуыстытæ, афтæмæй йæм Советы уæнгтæ æркастысты фыццаг бакасты. Закъоны проект бæлвырд кæны паддзахадон æвзæгтæй пайда кæныны уагæвæрд официалон уагдæтты, хъуыддæгтæ аразыны къабазы, дзыллон хабархæссæг фæрæзты архайды. Афтæмæй, паддзахадон æвзæгтæй пайда кæнынæн фидаргонд цæуынц барадон бындуртæ.
Республикон закъонты проекттæ æмæ закъонæвæрынадон хъæппæристы фæдыл ма æмбырды ныхас кодтой Парламенты профилон комитетты сæрдартæ Черчесты Аслан, Остъаты Георги, Реуазты Ларисæ, Киситы Мурат.
Уымæй уæлдай, Советы уæнгтæ сбæлвырд кодтой Республикæ Цæгат Ирыстон-Аланийы æвдæм равзæрст Парламенты фæндзай цыппæрæм æмæ фæндзай фæндзæм æмбырдтæн сæ боны фæтк æмæ саразыны æмгъуыдтæ.
ДЕДЕГКАТЫ Зæлинæ
