Уæрæсейы Хицауад Фæстауæрцы фондæй Хъолайы цъитимæ цæстдарыны нысанæн радих кодта 52 милуан соммæ ‘ввахс. Уыцы уынаффæ бафыста бæстæйы Хицауады Сæрдар Михаил Мишустин. Æхца дихгонд æрцæудзысты алыхуызон наукон æмæ профилон ведомствæты ‘хсæн.
Уæрæсейы Ахуырад æмæ наукæйы министрад цъитимæ геофизикон цæстдардæн ифтонггæрзтæ балхæнынæн райсдзæн 10 милуан сомы. Федералон иртасæн центр райсдзæн 6,3 милуан сомы, уыдонæй бынаты сараздзæн рæстæгмæ æмæ бындурон станцæтæ. Уæрæсейы Наукæты академийы географийы институт 3,7 милуан сомæй райсдзæн цæхгæрмæ электрон зондтæ уадзыны, мит æмæ ихы арф сбарыны, æртæбæрцæй цъитийы структурæ базоныны фæрæзтæ.
Уæрæсейы Наукæты академийы географийы институт бæстæйы Ахуырад æмæ наукæйы министрадæй райсдзæн 12 милуан сомы, цъитийы ихын цъар гляциологон æгъдауæй сбæрæг кæныны фæрæзтæ балхæнынæн. Уæрæсейы гидрометеослужбæйæн радих кæндзысты 26,3 милуан сомы, уыдонæй бæрзонд хæххон геофизикон институт 5,1 милуан сомæн цъитийы ихын цъар иртасдзæн, космосæй ист къамтыл кусдзæн. Цæгат Кавказы алфамбылайы гидрометеорологийы æмæ цæстдарды управлени райсдзæн хъæугæ ифтонггæрзтæ æмæ транспорт.
Мæскуыйаг паддзахадон университет 3,67 милуан сомæй балхæндзæн бæрзонд хæххон аэрокъамтæ æмæ нывтæ исыны, ихын тæлмы мæры температурæ барыны фæрæзтæ. Документы бæрæггонд æрцыд Хъолайы цъитийы ралæбырд не ‘руадзыны æппæт мадзæлттæ, ацы фæрæзтæн бæрнон чи у, уыдон æхца куыд хардзгонд æрцыд, уый тыххæй дзуапп дæтдзысты 2027 азы, 1 мартъийы.
Нæ уацхæссæг
