Советон æфсæдтæ фашистон æрдонгтæй Курск куы ссæрибар кодтой, ууыл ацы аз æххæст кæны 75 азы. Ацы кадджын цауы фæдыл знон нæ горæты Намысы аллеяйы уыд номарæн æмбырд. Архайдтой дзы Дзæуджыхъæуы бынæттон хиуынаффæйады администрацийы бæрнон кусджытæ, Ветеранты советы, æхсæнадон организациты минæвæрттæ.
Курскы къæлæты знаг советон æфсæдтæй бæрзæйсæттæн цæф кæй баййæфта, уый комкоммæ не Стыр Уæлахизыл куыд сахадыдта, уый тыххæй æмбырды радзырдта Ветеранты республикон советы сæрдар Къаболаты Солтан. Уый фæстæ кадджын æмбырдмæ æрбацæуджытæн сæ арфæйы ныхæстæ загътой Дзæуджыхъæуы бынæттон хиуынаффæйады администрацийы сæргълæууæджы хæдивæг Гозымты Раман, Фыдыбæстæйы Стыр хæсты архайæг Хуадонты Яхья. Æхсæнадон змæлд «Иры Стыр Ныхас»-ы сæрдары хæдивæг Еналдыты Хъазыбег.
Фæсивæды ’хсæн патриотон хъомыладыл нæ республикæйы астæуккаг ахуырады куыд архайынц, уый тыххæй радзырдта РЦИ-Аланийы ахуырад æмæ наукæйы министры хæдивæг Алыккаты Алан. Республикæйы Хæлардзинады хæдзары æфсæддон-патриотон фарстатыл цавæр куыст цæуы, уый тыххæй мидисджын ныхас ракодта йæ директор Кочиты Георги. Æмбырды ма раныхас кодтой Советон Цæдисы Хъæбатыр, Курскы къæлæты операцийы архайæг Тогызты Хъауырбеджы чызг Лейлæ. Уый радзырдта йæ фыды цард, хæстон сгуыхтдзинад æмæ æхсæнадон архайды тыххæй.
Кадджын æмбырды кæрон йæ архайджытæ дидинджытæ сæвæрдтой Намысы аллеяйы Советон Цæдисы Хъæбатыр Тогызты Хъауырбеджы ингæныл.
ГАСАНТЫ Валерии
