Тегераны дунеон наукон конференци «Ираны æмæ Уæрæсейы æхсæн культурон ныхас»-ы архайджытæ куыд загътой, афтæмæй 2022 аз Цæгат Ирыстоны Хетæгкаты Къостайы номыл паддзахадон университет рауадздзæн ЦИПУ-йы æмæ Алламе Табатабаийы номыл университеты дипломтимæ «Скæсæниртасынад æмæ африкæиртасынад»-ы фыццаг специалистты.
— Цæгат Ирыстоны æмæ Пысылмон Республикæ Ираны адæмты æхсæн ис рагон бастдзинæдтæ. Нæ хæс у канд истори иртасын нæ, фæлæ цардархайды алыхуызон къабæзты пайдайаг æмгуыстады гæнæнтæ дæр бæлвырд кæнын, — загъта æддагон бастдзинæдты фæдыл ЦИПУ-йы проректор Уæдаты Алан.
Уæлдæр ахуыргæнæндæттæ æнгом æмгуыст кæнын райдыдтой æндæраз. Ректортæ Огъуаты Алан æмæ Хоссейн Салими сæ къухтæ æрæвæрдтой æмгуыстады тыххæй бадзырды. Цæгат Ирыстоны паддзахадон университет наукон-иртасæн куыст куыд æххæст кæны, уый тегерайнаг университеты ахуыргæндтæ бæстон рабæрæг кодтой. Ирайнаг специалисттæ нæ ахуыргæнæндоны наукон архайдæй разыйæ баззадысты.
Фарон Цæгат Ирыстоны паддзахадон университеты уыд дунеон наукон-практикон конференци «Иран æмæ Цæгат Кавказ: истори æмæ æмгуыстады фадæттæ». Дыууæ ахуыргæнæндоны бафидыдтой магистрон программæ «Иран нырыккон дунейы» баххæст кæныныл.
Тегераны Алламе Табатабаийы номыл университеты дунеон конференцийы архайджытæ сæйраг æргом аздæхтой Ираны æмæ Уæрæсейы æхсæн культурон бастдзинæдты æмæ дипломатон ахастдзинæдты фарстатæм. Ирайнаг специалисттæ цæгатирыстойнаг ахуыргæндты докладтыл æхсызгонæй сæмбæлдысты. Историон наукæты доктор Бзарты Руслан сæйраг æргом аздæхта индийагирайнаг гуырæнтæй XIX æнусы онг ирæтты социалон цардмæ. ЦИПУ-йы Ахуырадон наукон-куыстадон комплексы директор Назим Гиджрати радзырдта Ираны æмæ Центрон Кавказы адæмты культурон бастдзинæдты æмæ миграцийы тыххæй. Историон факультеты декан Плиты Зæлинæ сæйраг æргом аздæхта Уæрæсейы æмæ Ираны рагон ахастдзинæдтæм, стæй дыууæ бæстæйы æхсæн культурон æмæ экономикон бастдзинæдтæ сфидар кæныны фарстатæм.
