Нӕ республикӕйы инвалидты ахсджиаг фарстатӕ куыд лыггонд цӕуынц, цавӕр мадзӕлттӕ арӕзт цӕуы сӕ царды уавӕртӕ хуыздӕр кӕнынӕн, уыцы хъуыддӕгтыл бӕлвырд ныхас цыдис знон Хицауады хӕдзары инвалидты хъуыддӕгты фӕдыл сӕрмагонд советы ӕмбырды. Амыдта йӕ Хицауады Сӕрдары хӕдивӕг Иринӕ АЗИМОВА
Советы уӕнгтӕ байхъуыстой афӕдзы куыстӕн дзуаппон докладтӕм ӕмӕ уыцы бӕрӕггӕнӕнтӕм гӕсгӕ фӕнысан кодтой сӕ дарддӕры куысты пълантӕ. Сӕйрагдӕрыл нымад уыдис УФ-йы социалон фӕдзӕхстады фонды цӕгатирыстойнаг регионалон хайады разамонӕг Айларты Зӕлинӕйы доклад. Уый бӕстон радзырдта, сӕ куыстмӕ цы фарстатӕ хауы, инвалидты социалон уавӕртӕ нывылкӕнынады уыцы архайд ӕрвылаз дӕр нӕ бӕстӕйы Президенты ӕмӕ нӕ республикӕйы Сӕргълӕууӕджы уынаффӕтӕ бӕрнонӕй ӕххӕстгонд кӕй цӕуынц, уый тыххӕй.
— Фонды регионалон хайад ӕххӕст кӕны, фӕкӕсынхъуаг адӕм ӕмӕ инвалидты социалон фарстатӕ, медицинон-техникон хъӕугӕ фӕрӕзтӕ, санаторон-курортон дзӕбӕхкӕнынад, алыхуызы пособитӕ фидыны ӕмӕ социалон фӕдзӕхстады иннӕ фарстатӕ. Паддзахадон хӕстӕ хуыздӕр ӕмӕ хӕрзхъӕддӕр ӕххӕст кӕныны бындурыл ӕмгуыст кӕнӕм инвалидты ӕхсӕнадон организацитимӕ: Пенсион фонд, Медицинон-социалон экспертизӕйы сӕйраг бюро, сывӕллӕтты барты фӕдыл ӕххӕстбарджын минӕвӕрттӕ, Ирыстоны медицинон кусӕндӕттӕ ӕмӕ районты администрациты сӕргълӕуджытимӕ.
Афтӕмӕй, нӕ республикӕйы паддзахадон социалон ӕххуыстӕ исыны бар кӕмӕн ис, уыцы льготон категориты граждӕнты нымӕц у 91591 адӕймаджы. Уыдонӕй 67 343 — инвалидтӕ, 3593 — сывӕллӕттӕ-инвалидтӕ, 26655 та — ӕндӕр категориты адӕймӕгтӕ. 2018 азы инвалидты техникон фӕрӕзтӕй сифтонг кӕныны хъуыддагӕн ӕхца дихгонд ӕрцыд 87 милуан ӕмӕ 660,6 мин сомы. Фонды хайадмӕ курдиӕттӕ ӕрбалӕвӕрдтой 22588 адӕймаджы. Уыдонмӕ гӕсгӕ инвалидтӕн лӕвӕрд ӕрцыд протезтӕ, ортопедион дзауматӕ, коляскӕтӕ.
— Фонды арӕзт ӕрцыд сӕрмагонд къамис, ӕмӕ уӕлдӕрамынд техникон дзауматӕ инвалидты реабилитацийӕн нӕ республикӕмӕ ӕрвыст куы ӕрцӕуынц, уӕд сӕм бӕлвырд цӕстдард цӕуы къамисы ‘рдыгӕй. Къамисы уӕнгтӕ та сты инвалидты ӕхсӕнадон организациты минӕвӕрттӕ.
— 2016 азӕй фӕстӕмӕ УФ-йы фӕдзӕхстады фонд ӕххӕст кӕны, «пилотный проект» кӕй хонынц, уыцы программӕ. Инвалид сывӕллӕттӕ цы бинонты ис, уыдоны техникон фӕрӕзтӕй ифтонг кӕныны куыст. Ис нын иудадзыг ӕнгом бастдзинад сахъат сывӕллӕтты ныййарджытӕ, дзӕбӕхгӕнӕн-профилактикон куыстуӕттӕ ӕмӕ медикон-социалон экспертизӕйы бюроимӕ, уымӕй уӕлдай нӕ менеджертӕ сывӕллӕтты ныййарджытӕн информаци дӕттынц иннӕ социалон ӕххуыстӕ исыны фӕдыл дӕр.
Санаторитӕ ӕмӕ курорттӕм ацы аз ӕрвыст ӕрцыд 1220 адӕймаджы, ацы мӕй ма ацӕудзысты 33 адӕймаджы. Федералон закъоны бындурыл ӕнамонд цауты бахауӕг, куыстуаты хъыгдардбаййафӕг адӕмы ӕнӕмӕнг социалон фӕдзӕхстадмӕ гӕсгӕ уӕлдӕрамынд категорийы граждӕнтӕй 1344 адӕймаджы райстой социалон фӕдзӕхстады пособитӕ. Уыдонӕй 220, сӕ хӕдзардарӕг кӕмӕн фӕхъуыд, ахӕм бинонтӕ, 1124 — куыстуаты хъыгдардбаййафӕг адӕймӕгтӕ. ӕхцайы хӕрдзты иумӕйаг нымӕц сырӕзыд 186 милуан ӕмӕ 171 мин соммӕ, — загъта Айларты Зӕлинӕ.
Ацы фарстайы фӕдыл ма социалон фонды разамонӕг куыд загъта, афтӕмӕй нӕ республикӕйы инвалидты фылдӕр хай сӕхи атигъ кодтой «Соцпакетӕй». Ӕмӕ бирӕ лӕггӕдтӕй инвалидтӕ сӕхи кӕй ӕнӕхай кӕнынц, уый раст нӕу.
Советы ӕмбырды РЦИАланийы медицинон-социалон экспертизӕйы сӕйраг бюройы разамонӕг Бериты Лирӕ дзырдта, инвалидты реабилитацийы программӕты кӕимӕ кусынц, уыцы ведомствотӕ ӕмӕ министрадты архайды фӕдыл, РЦИ-Аланийы адӕмӕн куыстдӕттӕн комитеты сӕрдар Платы Альбинӕ та дзуаппон доклад скодта, нӕ республикӕйы куыстхъом инвалидтӕн куысты бынӕттӕ агурыны ӕмӕ дӕттыны фарстайы фӕдыл ӕмӕ загъта, канд инвалидтӕ нӕ, фӕлӕ куыстхъом адӕмӕн дӕр кӕй нӕ фаг кӕны бынӕттӕ.
РЦИ-Аланийы ахуырад ӕмӕ наукӕйы министры хӕдивӕг Алыккаты Алан та радзырдта, министрад куыд ӕххуыс кӕны, ӕртӕ азы онг инвалид сывӕллӕттӕ цы хӕдзӕртты ис, уыцы бинонтӕн ахуырады ӕмӕ иннӕ фарстаты фӕдыл.
САУТӔТЫ Тамилӕ Къамтӕ систа ЦӔГӔРАТЫ Дауыт
