Республикæйы Сæргълæууæг, политикон парти «Иугонд Уæрæсе»-йы цæгатирыстойнаг регионалон хайады секретарь Сергей МЕНЯЙЛО архайдта партийы ХХIII съезды дыккаг къæпхæны æмбырды Мæскуыйы.
Пленарон æмбырды раныхас кодта Уæрæсейы Федерацийы Президент Владимир Путин æмæ, фыццаджыдæр, уæрæсейæгтæн арфæ ракодта Уæрæсейы Тырысайы боны фæдыл. Президент куыд бафиппайдта, афтæмæй Уæрæсейы Тырыса, йемæ герб æмæ гимн, у национ символтæй иу.
– Нæ тырысаимæ нæ хъæбатыр хæстонтæ цæуынц размæ, бæрзонд æй сисынц, цы горæттæ æмæ хъæутæ ссæрибар кæнынц, уыдоны сæрмæ. Нæ тых ис фронт æмæ фæсчъылдымы иудзинады, нæ фыдæлтæ нын кæй балæвар кодтой, уыцы хæзнаты фидардзинады. Мах стæм иу адæм æмæ иумæ хæцдзыстæм нæ Райгуырæн зæххы сæрибарыл, нæ тырысайы сæраппонд, – загъта Владимир Путин.
Президент куыд бафиппайдта, афтæмæй æвзæрстытæ нæ бæстæ æмæ йæ политикон системæ ноджы кæй фæфидар кæндзысты, не знæгты ныхмæ фидар фæлæууынæн ахъаз кæй уыдзысты, стæй, милуангай уæрæсейаг адæмтæ сæ иумæйаг хъуыды кæй равдисдзысты, уый гуырысхойаг нæу.
– Хицаудзинад сты адæм. Æмæ Конституцимæ гæсгæ сын ис сæ минæвæртты æвзарын æмæ паддзахады дарддæры рæзты нысантæ бæлвырд кæныны бар. Уымæ гæсгæ, не стыр бæстæйы алы ран дæр – Дард Скæсæнæй Новоросси æмæ Донбасмæ – алы къæпхæны æвзæрстытæ дæр арæзт æрцæудзысты. Архайдзысты дзы, хæстæн йæ тæккæ фыццаг хаххы чи хæцы, нæ уыцы æфсæддонтæ дæр. Уымæ гæсгæ, Паддзахадон Думæмæ сентябры æвзæрст чи æрцæудзæн, уыцы депутаттыл æвæрд цæуы стыр хæс. Съезд абон кæуыл ныхас кæндзæн, стæй кæй фидар кæндзæн, уыцы адæмон программæ у стыр æмæ ахъаззаг куысты фæстиуæг. Адæм æм бахастой сæ фæндæттæ æмæ уынаффæтæ. Уый амоны, парти уыцы программæйы алы рæнхъыл дæр дзуапп кæй дæтдзæн, аргъ та йын кæй кæндзысты æвзарджытæ, – загъта Президент.
Йæ раныхасы фæстæ Владимир Путин арфæ ракодта Сергей Меняйлойæн йæ райгуырæн боны фæдыл.
Съезды æмбырды фæдыл йæ хъуыды загъта Цæгат Ирыстоны Сæргълæууæг:
– Программæйы амынд сты авд сæйраг фæзилæны. Нæ республикæйæн се ‘ппæт сты ахсджиаг: демографи æмæ æххуыс сывæллонджын бинонтæн, ахуырад, экономикæйы рæзт, историон рæстдзинад хъахъхъæнын, фæсивæды патриотон хъомылад, æххуыс сæрмагонд æфсæддон операцийы архайджытæн æмæ сæ бинонтæн, нæ бæстæйы æдасдзинад бахъахъхъæнын. Ныр алы нысаны фæдыл дæр хъæуы нæ хæстæ сбæлвырд кæнын.
«Иугонд Уæрæсе»-йы XXIII съезды дыккаг къæпхæны куысты архайдтой не ‘ппæт бæстæйы æртæ мин делегаты: сæрмагонд æфсæддон операцийы Хъæбатыртæ, алы æмвæзадты депутаттæ, сенатортæ, регионты разамонджытæ, эксперттæ.
Цæгат Ирыстоны делегацийы уæнгтæ уыдысты VII равзæрст Паддзахадон Думæйы депутаттæ Таймазты Артур æмæ Мæхъиты Зураб, нæ республикæйы Хицауады Сæрдары фыццаг хæдивæг Атарты Георги, республикæйы Парламенты Сæрдар, «Иугонд Уæрæсе»-йы регионалон æхсæнадон исæнуаты разамонæг Тускъаты Таймураз, партийы регионалон хайады секретары фыццаг хæдивæг Едзойты Марат, «Иугонд Уæрæсе»-йы Сæйраг советы уæнг, Уæрæсейы Хъæбатыр Абайты Юри, стæй партийы регионалон конференцийы æвзæрст минæвæрттæ.
ДЕДЕГКАТЫ Зæлинæ
