Национ аивады дунеон фестиваль «Рязанский хоровод»-ы ацы хатт цы бирæ сфæлдыстадон коллективтæ архайдта, уыдонæй иу сси Цæгат Ирыстоны адæмон кафты паддзахадон ансамбль «Алан».
Уый тыххæй фехъусын кодта РЦИ-Аланийы Культурæйы министрады пресс-службæ.
Цалдæр уæрæсейаг регионы æмæ фæсарæйнаг бæстæйы сфæлдыстадон коллективты ‘хсæн ирыстойнаг «Алан» йæ аивадæй бæрæг дардта — Рязаны цæрджытæ æмæ уазджытæн нæ артисттæ равдыстой Кавказы адæмты кæфтыты программæ. Зындгонд куыд у, афтæмæй ацы аз коллективыл æххæст кæны 80 азы — уыцы хъусынгæнинагыл дæр зæрдиагæй сæмбæлдысты фестивалы архайджытæ.
Знон та «Алан» йæ гастролон балцы фæлгæты бабæрæг кодта Владимиры облæсты горæт Ковров — бынæттон Культурæйы галуаны сценæйыл ирыстойнаг артисттæ равдыстой сæ дысныдзинад.
Хæстæгдæр бонты та «Аланы» концерттæ уыдзысты горæттæ Белгород, Орел æмæ Мæскуыйы.
Нæ уацхæссæг
