Æрбахаццӕ кӕны не стырдӕр бӕрӕгбӕттӕй иу — Уастырджимӕ кувӕн къуыри (Джеоргуыба). Куыд зонут, афтӕмӕй ацы азӕй фӕстӕмӕ «Иры Стыр Ныхас»-ы хъӕппӕрисӕй, стӕй республикӕйы Парламенты закъон ӕмӕ БИТАРТЫ Вячеславы бардзырдӕй, бӕрӕгбоны къуырийӕн йӕ фыццаг къуырисӕр уыдзӕн фӕлладуадзӕн, ӕнӕкусгӕ бон. Уыцы бон алы бинонтӕ дӕр хӕдзары скӕнынц ӕртӕ кӕрдзыны, скувынц Хуыцау ӕмӕ Уастырджимӕ, бинонты сыл бафӕдзӕхсынц. Цӕмӕй къуырисӕры куысты фарстатыл ма тыхсӕм, бӕрӕгбонмӕ фӕскуыст тагъд-тагъдӕй ма цӕттӕ кӕнӕм, растдӕр уыд бӕрӕгбон паддзахадон закъонӕй сфидар кӕнын. Нӕ фыдӕлтӕ дӕр ацы бон кусгӕ нӕ кодтой.
Фӕлӕ Парламент ӕмӕ республикӕйы Сӕргълӕууӕгмӕ цы курдиат балӕвӕрдтам, уымӕн ма уыди ноджы ӕндӕр нысан дӕр. Фыццаджыдӕр, кӕд Джеоргуыба ирон адӕмы бӕрӕгбон у, уӕддӕр ӕм хъуамӕ ӕрхонӕм немӕ хӕларӕй чи цӕры, уыцы иннӕ адӕмыхӕттыты минӕвӕртты дӕр. Сыхбӕсты, хъӕубӕсты мидӕг хъуамӕ кӕрӕдзи дихтӕ ма кӕнӕм. Скӕнӕм ӕппӕтадӕмон, иугӕнӕн бӕрӕгбон.
Иннӕмӕй та, «Иры Стыр Ныхас»- ы фидар хъуыдымӕ гӕсгӕ, бӕрӕгбон хъуамӕ ӕрмӕст фынгтыл ма ацӕуа. Нӕ фыдӕлты фарн ӕмӕ зондахастӕй спайда кӕнӕм. Кӕд кувгӕйӕ фӕзӕгъӕм, Уастырджи байрагӕй бӕх кӕны, лӕппуйӕ та — лӕг, уӕд хъуамӕ нӕ рӕзгӕ фӕсивӕд уыцы бон рох ма уой. Уыдон сты нӕ фидӕны бӕлццӕттӕ, Фыдыбӕстӕ хъахъхъӕнджытӕ, Ирыстонӕн кад ӕмӕ намыс хӕсджытӕ, нӕ цард аразджытӕ. Кӕд нӕ фыдӕлтӕм ӕртӕаздзыд лӕппу лӕджы бындзӕфхадыл нымад уыди, уӕд абон дӕр нӕ кӕстӕртӕм хъуамӕ уыцы цӕстӕй кӕсӕм, ахуыр сӕ кӕнӕм ӕгъдауыл, ирон лӕджы дӕсныйӕдтыл, царды зындзинӕдтӕн фидар лӕууыныл.
Уый фӕдыл сидын нӕ куырыхон уынаффӕгӕнӕг хистӕртӕм. Уӕ хорзӕхӕй, ӕрбаввахс кӕнут уӕ сыхбӕстӕты кӕстӕрты уӕхимӕ, таут сыл нӕ фыдӕлты фарн. Дардӕй кӕсгӕйӕ дзы нӕ фӕхъӕстӕ уыдзысты. Арвитӕм ацы бон ӕцӕг бӕрӕгбоны хуызӕн: саразӕм кӕстӕртӕн ерыстӕ, ирон хъӕзтытӕ, хъазтизӕртӕ. ӕнӕмӕнг нӕм хъӕппӕрисджын сылгоймӕгтӕ дӕр фӕкӕсдзысты бацӕттӕ кӕнынмӕ. Фӕлӕ алцыдӕр у аразгӕ кӕртыты хистӕртӕй. Уӕ хорзӕхӕй, равдисут уӕ лӕгдзинад. Мӕ ныхас хъыг макӕмӕ фӕкӕсӕд, фӕлӕ бӕрӕгбон ӕрмӕст фынджы уӕлхъус цы кӕрт, цы сыхбӕстӕ арвита, уый у ӕдзӕллаг, нӕй дзы Фарн.
Сыхбӕстӕйы фӕсивӕдӕн кармӕ гӕсгӕ ис саразӕн спортивон ерыстӕ:
Æнӕмӕнг, спортивон ерыстӕй уӕлдай алы кӕрты дӕр фӕсивӕдӕн хъӕуы саразын хъазтизӕр. Фӕндырдзӕгъдджытӕ нӕм абон бирӕ ис, куы нӕ уа, уӕд та нырыккон электронон фӕрӕзтӕй дӕр ис спайда кӕнӕн. Цы ис хуыздӕр уыцы бон алы кӕртӕй дӕр ирон цагъд ӕмӕ зарӕг куы хъуысой, уӕд. Кӕд уӕ уӕ бӕрӕгбоны рӕсугъддзинад ӕмӕ фарн бафӕнда равдисын телеуынынады ӕмӕ газетты, уӕд-иу нӕм рагацау ӕрбадзурут мӕнӕ ацы телефонтӕм: 53-99-18, 53-57-87.
Уӕ хорзӕхӕй, бахизӕм нӕхи фыднозт, фыдхӕрд ӕмӕ ӕнӕгъдаудзинадӕй. Нӕ фыдӕлтӕм уыдон уыдысты худинаг. Хуыцау ӕмӕ Уастырджимӕ кувут бӕгӕныйӕ, незамантӕй нырмӕ уымӕй кадджындӕр нозт нӕ уыди ирон адӕммӕ. Карз нозтӕй зонӕм бӕрц, ма дзы хатӕм тыхӕй кӕрӕдзимӕ, ма ӕфтауӕм нӕхи кӕстӕрты цӕсты. Хистӕр йӕхӕдӕг ӕгъдаухӕссӕг ӕмӕ ӕгъдауӕвдисӕг куы нӕ уа, уӕд ӕм кӕстӕр никуы байхъусдзӕн, бонизӕрмӕ йын зондамонӕн ныхӕстӕ куы дзура, уӕддӕр.
Бирӕтӕ фӕндӕгтыл цӕуӕг сты хӕдтулгӕ машинӕты, ӕмӕ-иу бӕрӕгбоны къуыри ӕгъдауы мидӕг аназын кӕй зӕрды уа, уый йӕ хӕдтулгӕ хӕдзары ныууадзӕд. Ис бирӕ такситӕ, кӕнӕ дӕ зонгӕтӕй, дӕ хӕлӕрттӕй чи нӕ нуазы, уый дӕ хӕдзармӕ куы баласид, уӕд уый — хуыздӕр. Ма сфӕнд кӕн нозтджынӕй машинӕ скъӕрын, ма бафтау фыдбылызы дӕхи дӕр ӕмӕ искӕй дӕр. Адӕймаджы цард аскъуынынӕй ӕппӕты карздӕр ӕфхӕрд хуыздӕр у. Барадхъахъхъӕнджытӕй курӕм, цӕмӕй уыцы бонты расыггӕнджыты зӕрдӕхудтӕй ӕппындӕр ма тӕрсой, сӕ куыст куыд ӕмбӕлы, афтӕ кӕной.
Уӕ хорзӕхӕй, балӕггад кӕнӕм нӕ кӕстӕртӕн, раздахӕм сын се ‘ргом нӕ фыдӕлты ӕвидигӕ Фарн ӕмӕ ӕгъдаумӕ! Уымӕй cуыдзысты тыхджындӕр, ныфсджындӕр ӕмӕ царды мидӕг ӕнтыстджындӕр. Уастырджийы хорзӕх уӕ уӕд! Нӕ фӕсивӕд — йе уазӕг!
КУЧИТЫ Руслан «Иры Стыр Ныхас»-ы сӕрдар
