Дзæуджыхъæуы центрон библиотекæйы уыд поэт, журнал «Ирæф»-ы бæрнон секретар Колыты Виталийыл 60 азы кæй сæххæст, уый фæдыл юбилейон изæр. Архайдтой дзы Фысджыты цæдисы, Цæгат Ирыстоны Культурæйы министрады, рауагъдад «Ир»-ы бæрнон кусджытæ, Æрæфы æмæ Дыгуры районты минæвæрттæ, Виталийы хæстæджытæ æмæ хиуæттæ, чиныгкæсджытæ.
Юбилейон изæр цыбыр раныхасæй байгом кодта æмæ Виталийы цард æмæ сфæлдыстадон архайдыл афæлгæсыд библиотекæйы бæстæзонæн хайады сæргълæууæг, РЦИ-Аланийы культурæйы сгуыхт кусæг Дзугаты-Мурасты Риммæ. Йæ раныхасæн хорз цæстуынгæ дæнцæг уыдысты видеослайдтæ. Уый фæстæ поэты æмдзæвгæтæ бакастысты Дыгурон паддзахадон драмон театры артисткæ Хуыдæлты Маринæ. Цæгат Ирыстоны Тæбæхсæуты Балойы номыл паддзахадон драмон академион театры режиссер, УФ-йы сгуыхт артист Сæбанты Тамерлан юбилярæн арфæ ракодта театры аивадон разамонæг Колыты Владиславы номæй. Виталийы æмдзæвгæтыл зарджытæ акодтой Гъуцъунаты Ацæмæз, РЦИ-Аланийы сгуыхт артисткæ Сечъынаты Элитæ, Зарæггæнджыты къорд «Æрæф» (фæндырæй та цагъта Хекъилаты Людмилæ) Колыты Виталийæн ма йæ бæрæгбоны фæдыл зæрдиаг арфæтæ ракодтой историк, бæстæзонæн клуб «Фыдыбæстæ»-йы сæргълæууæг Хъарданты Тимур, ахуыргæнæг Хæллаты Азæ, Центрон библиотекæйы литературон клуб «Суадон»-ы уæнг Гегкиты Сослан, Уæдаты Сулейман. Колыты Витали ирон литературæмæ цавæр æвæрæн хæссы, йе сфæлдыстад адæмы зондахастыл куыд ахады, уый тыххæй сæ хъуыдытæ загътой Цагат Ирыстоны Фысджыты цæдисы сæрдар, Хетæгкаты Къостайы номыл паддзахадон премийы лауреат Агънаты Гæстæн, журнал «Ногдзау»-ы сæйраг редакторы хæдивæг, Хетæгкаты Къостайы номыл паддзахадон премийы лауреат Дзасохты Музафер, Фысджыты цæдисы сæрдары хæдивæг Скъодтаты Эльбрус (юбилярæн арфæ ракодта æмæ йын Культурæйы министрады номæй балæвæр кодта РЦИ-Аланийы адæмон нывгæнæг Сабанты Хаджумары репродукциты альбом), газет «Рæстдзинад»-ы сæйраг редактор Хозиты Барис, зындгонд поэт æмæ фыссæг Хохойты Энвер, зындгонд композитор, Цæгат Ирыстоны аивæдты сгуыхт архайæг Кокайты Барис, Цæгат Ирыстоны адæмон поэт Дауыраты Зоя, Дзæуджыхъæуы Хетæгкаты Къостайы номыл 13-æм астæуккаг скъолайы директор, РЦИ-Аланийы сгуыхт ахуыргæнаг СæлбитыКолыты Иринæ, Виталийы æмкурсон, поэт Дыгъуызты Тенгиз.
Дзæуджыхъæуы центрон библиотекæйы хайады сæргълæууæг, РЦИ-Аланийы культурæйы сгуыхт кусæг Хуытъиаты Зоя бацæттæ кодта Колыты Виталийы цард æмæ сфæлдыстадыл дзурæг мыхуыргонд æрмæджыты библиографион амонæн.
АНВАРАТЫ В.
