Ирон литературӕйы бындурӕвӕрӕг Хетӕгкаты Къостайы сфӕлдыстады кадӕн Дзӕуджыхъӕуы центр «Заря»-йы уыд ӕмдзӕвгӕтӕ кӕсджыты 6-ӕм республикон конкурс «Дӕ ном мыггагмӕ у цӕринаджы» кӕронбӕттӕн.
Нӕ республикӕйы адӕмон артисткӕ Рӕмонаты Ритӕ сӕрдариуӕг кӕм кодта, уыцы дӕсны жюрийы уӕнгтӕ ерысгӕнджыты аивадӕн аргъ кодтой ахӕм номинацитӕм гӕсгӕ: “ӕмдзӕвгӕ аив кӕсын» ӕмӕ «Театралон сфӕлдыстад».
Фыццаг, амынд номинацийы бӕрӕггӕнӕнтӕм гӕсгӕ, раззаг бынӕттӕ бацахстой Цӕгат Ирыстоны паддзахадон педагогон институты, Цӕгат Кавказы хъӕды техникумы, Дзӕуджыхъӕуы базарадон-экономикон техникум ӕмӕ 3-ӕм профессион училищӕйы ахуырдзаутӕ Тыджыты Снежанӕ, Баскаты Снежанӕ, Элинӕ Плахтий ӕмӕ Гаджиты Мурат.
— Фыццаг хатт кӕм архайдтон, уыцы конкурсмӕ равзӕрстон Къостайы ӕмдзӕвгӕ «Мне нравится, мой друг». Адӕймаджы рӕсугъд ӕнкъарӕнтӕ ӕвдисӕг ацы уацмыс мӕ зӕрдӕмӕ цӕуы. Сценӕмӕ рацыдтӕн фыццаг хатт. Раззаг бынӕттӕй мын иу кӕй саккаг кодтой, уымӕй райгонд дӕн, — зӕгъы Элинӕ Плахтий.
Номинаци «Театралон сфӕлдыстад»-ы фӕуӕлахиз Цӕгат Кавказы аграрон-технологон колледжы коллектив, дыккаг ӕмӕ ӕртыккаг бынӕттӕ та бацахстой Дзӕуджыхъӕуы базарадон-экономикон техникум ӕмӕ Калоты Георгийы номыл бирӕкъабазджын техникумы минӕвӕрттӕ.
Уымӕй уӕлдай, авторон ӕмдзӕвгӕ аивӕй бакӕсыны тыххӕй Бузныджы гӕххӕттӕй хорзӕхджын ӕрцыд Дзӕуджыхъӕуы базарадон-экономикон техникумы ахуырдзау Гӕджынаты Ардӕ.
Конкурсы кӕрон йӕ архайджытӕ ӕмӕ уазджытӕн равдыстой киноныв «Сын Иристона», центр «Заря»-йы фойейы та нывкӕнынады студи «Акварель»-ы ахуырдзауты куыстытӕй сарӕзтой равдыст «Къоста ӕмӕ сывӕллӕттӕ».
