Цӕгат Ирыстоны промышленност ӕмӕ транспорты министр Хайдарбек Бутов ӕмӕ аэропорт «Дзӕуджыхъӕу»-ы генералон директор Сергей Чаловӕн цы фембӕлд уыд, уым сӕйраг ӕргом аздӕхтӕуыд ацы ахсджиаг транспортон объекты ног терминалы арӕзтады фарстмӕ.
Фембӕлды фӕстӕ министр журналисттӕн куыд радзырдта, афтӕмӕй аэропорты ног терминалы арӕзтад райдайдзӕн ацы аз. Ног бӕстыхайы проект дзуапп дӕтты ӕппӕт нырыккон домӕнтӕн дӕр. «Уӕлдӕфон балцыты ӕдасдзинады фӕтк ӕнӕкъуыхцыйӕ ӕххӕстгонд кӕм цӕудзӕн, уыцы ног терминалы адӕмы ӕнцойдзинадӕн фӕзындзӕн уӕлӕмхасӕн фадӕттӕ. Зӕгъӕм, бӕлццӕтты хӕдтӕхӕгмӕ фистӕгӕй кӕнӕ автобусыл цӕуын нал бахъӕудзӕн, фӕлӕ-иу сӕрмагонд мобилон «дысы» фӕрцы комкоммӕ бакъахдзӕф кӕндзысты хӕдтӕхӕджы салонмӕ», — загъта Хайдарбек Бутов.
Сергей Чаловы ныхасмӕ гӕсгӕ, ног терминалы иумӕйаг фӕзуат уыдзӕн 5 600 квадратон метры бӕрц. Иу сахатмӕ дзы лӕггад кӕндзысты 400-450 адӕймагӕн (иу азмӕ та — милуан адӕймагӕн). Рагагъоммӕйы нымадмӕ гӕсгӕ, проекты аргъ у 1,3 миллиард сомы бӕрц. Куыд нысангонд цӕуы, афтӕмӕй аэропорты ног бӕстыхай байгом уыдзӕн 2022 азы.
Аннӕ Катольянц
