2021 азы, Мæскуыйы Евгений Вахтанговы номыл академион театрыл æххæст кæны 100 азы. Уыцы цауы фæдыл нæ бæстæйы цы кадджын мадзæлттæ арæзт æрцæудзæн, уыдонæн сæ зынгæдæр у, Дзæуджыхъæуы Евгений кæм райгуырд, уыцы хæдзары йæ номыл музей кæй байгом уыдзæн, уый.
Ацы цауы тыххæй хъусын кæны журнал «Театрал», Мæскуыйы Евгений Вахтанговы номыл театры пресс-службæйы информацимæ гæсгæ. Йæ бæстыхайы ма экспозицийæ уæлдай уыдзæн зал. Уым та, Вахтанговы номыл Мæскуыйы æмæ Дзæуджыхъæуы цы дыууæ театры ис, уыдон радыгай æвдисдзысты спектаклтæ. Нæ республикæйы иннæ театртæн дæр дзы сæ бон уыдзæн се сфæлдыстадон куыстытæ æвдисын. Афæдзы дæргъы дзы уыдзæн 5-6 аивадон изæры.
— Афæдзмæ цалдæр хатты нæ театры хуыздæр артисттæ ссæудзысты Дзæуджыхъæумæ æмæ-иу мемориалон музейы сценæйы æмæ залты æвдисдзысты концерттæ æмæ чысыл спектаклтæ. Афтæмæй Дзæуджыхъæу йæхимæ ноджы фылдæр здахдзæн аивадуарзджыты æргом. Номарæн музей байгом кæныны хабæрттæ бæрæг уыдзысты, 16 мартъийы театры ног сценæйы цы пресс-конференци уыдзæн, уым, — бафиппайдтой театры кусджытæ.
Дзыллон-хабархæссæг фæрæзты минæвæрттимæ фембæлдысты Мæскуыйы Евгений Вахтанговы номыл академион театры аивадон разамонæг Римас Туминас, директор Кирилл Крок, театры зындгонд артисттæ, РЦИ-Аланийы минæвæрттæ æмæ, музей саразынæн æхцайæ чи баххуыс кодта, уыдон.
