Фыдæлты æгъдау æмæ фарн кæстæртæ рæсугъдæй дзыллæмæ куы хæссой, уæд ма уымæй хуыздæр цы уа! Ахæм фæсивæд та Ирыстоны чысыл нæй. Уыдонæй иу у паддзахадон филармонийы вокалон къорд «Уацамонгæ»-йы уæнг ЧИХАУИТЫ Георги. Ис æм уæздандзинад æмæ фыдæлты культурæйæн аргъ кæныны тых, сыгъдæг æмæ бафæзминаг у аивадмæ уарзтæй. Уыцы ахастæй бæрæг дардта, Дзæуджыхъæуы Хетæгкаты Къостайы номыл 13-æм астæуккаг скъолайы куы ахуыр кодта, уæд.
Скъолайы фæстæ Георги ахуыр кæнынмæ бацыд ЦИПУ-йы историон факультетмæ æмæ йæ æнтыстджынæй каст фæцис. Ам дæр дзы тынг разы уыдысты йæ ахуыргæнджытæ æмæ æмбæлттæ.
Иууыл диссагдæр та у, Георги фыдæлтыккон зарджытæ йæ уды бæрц кæй уарзы, уый. Йæ аив хъæлæсæй сæ куы самоны, æмæ йын йе ‘мбæлттæ аивæй куы бахъырнынц, уæд адæймаг бахауы æнахуыр рæсугъд дунемæ. Уым та балæууы раг æнусты, нæ тызмæг хæхты астæу, фыдæлты Ныхасы, куывды, чындзæхсæвы… Æмæ йæхи афтæ фенкъары, цыма ныртæккæ уæларвмæ стæхдзæни. Георги арæхдæр фæзары, РЦИ-Аланийы адæмон нывгæнæг, уæздан æмæ æфсармджын хистæр Сæбанты Хаджумар цы зарджытæ æмæ кадджытæ кодта, уыдон.
Георгийæн йæ фыдæлтæ сты Къуымбылты хъæуæй рацæугæ. Йæ фыды фыд Юри зарынмæ дæсны уыди. Йæ мады фыд Чеджемты Хаджумар дæр уыди, аивады рухс кæмæ хæццæ кодта, уыцы хистæртæй иу. Цы зарджытæ кодтой, уыдон Георгийæн ничи бацамыдта. Сæ бæсты йын рухсмæ хонджытæ систы Сæбанты Хаджумары (Будзулайы) зарджытæ æмæ кадджытæ. Фыццаг хатт сæ куы фехъуыста, уæд фырцинæй йæ цæссыгтæ æркалдысты. Æмæ йæхинымæр загъта: «Цæй диссаджы хистæр дæ, дæ хъæлæсы аив мыртæ, зæдты ныхæстау, зæрдæйæн куыд æхцон сты!» Фæстæдæр Сæбанты Хаджумары лæгæй-лæгмæ куы базыдта, уæд та йæ зæрдæ бынтондæр атади! Хаджумар ын цы зарджытæ æмæ кадджытæ кодта, уыдонмæ хъусынæй не ‘фсæсти, йæ цæстытæ-иу цæхæр скалдтой. Æмæ йæм уæд ацы фæрнджын лæджы вокалон репертуар сахуыр кæнынмæ хорз фæкасти номдзыд хормейстер, РЦИ-Аланийы адæмон артисткæ Дзанайты Ольгæ.
Кæд Георги нырма æрыгон у, уæддæр зоны бирæ рагон хъайтарон æмæ лирикон зарджытæ æмæ кадджытæ. Цæмæй фыдæлты аивады рухс дзыллæтæм аивдæрæй хæсса, уымæн ын хорз æххуыс сты вокалон къорд «Уацамонгæ»-йы цæхæрцæст фæсивæд Хуадонты Мæхæмæт, Биазырты Георги, Хадыхъаты Аланæ, Калоты Георги, Гогаты Марклен, Хъуысаты Сослан, Битарты Фидар. Ацы фæсивæд сты республикон, æппæтуæрæсеон æмæ ма суанг дунеон конкурсты уæлахиздзаутæ дæр. Зæрдиагæй сыл чи ауды, се сфæлдыстадон фæндтæ сын цардмæ рауадзынæн чи ‘ххуыс кæны, уыдон та сты паддзахадон филармонийы ирон адæмон музыкалон инструментты оркестры аивадон разамонæг, курдиатджын музыкант Ходы Олег, продюсер Битарты Алекс æмæ УФ-йы аивæдты сгуыхт архайæг, нæ республикæйы Композиторты цæдисы сæрдар, Цæгат Ирыстоны паддзахадон филармонийы директор Магкоты Ацæмæз.
— Вокалон къорд «Уацамонгæ»-йы цы фæсивæд зары, уыдоны ‘хсæн не скъолайы рауагъдон Чихауиты Георги кæй ис, уымæй дæн сæрыстыр. Скъолайы дæр йе ‘гъдау йæ разæй цыди, ныр та йæ фыдæлтыккон зарæгимæ Ирыстоны дзыллæйæн кæй æвдисы, уый мын у зæрдæрухсы хос. Георги æмæ, йемæ цы лæппутæ зары, уыдон сты бафæзминаг. Се ‘ппæтæй зарæггæнджытæ нæ рауайдзæн, фæлæ ирон зарæг куы бауарзой, уæддæр иттæг хорз у, — дзырдта мын Дзæуджыхъæуы 13-æм скъолайы директор, нæ республикæйы сгуыхт ахуыргæнæг Сæлбиты Иринæ.
Георгимæ чи байхъусы, уыдон ын æмхъæлæсæй фæзæгъынц: «Сæбанты Хаджумары нын æрымысын кæныс». Георгийæн йе ‘фсарм бацагайынц, æмæ йæ мидбылты уæзданæй зына-нæзына бахуды. Уыцы уæздандзинад ис йæ туджы. Æмæ ныр къорд азы нæ фыдæлтæн кад кæны, сæ лæгдзинады æмæ тухæйнаджы хабæрттæ сын зарджыты æмæ кадджыты аивæй кæй рахæссы, уымæй. Уымæн цы ныфс æмæ хъару хъæуы, уыдон сты Георгимæ æмæ сæ, адæмы фарныл æнцайгæйæ, тауы Ирыстоны зæххыл. Рох кæнын нын нæ уадзы Сæбанты Хаджумары ирд курдиат, йæ ном, адæмон зарджытæ, фыдæлты фарн æмæ культурæ!
ГАСАНТЫ Валери
