Æрæджы Æнæниздзинад хъахъхъæнынады дунеон организаци ног низæфтауæг коронавирусы пандеми кæй расидт, уыцы æууæл хынцгæйæ, куыд иннæ бæстæтæ, афтæ Уæрæсейы дæр сæрмагонд санитарон мадзæлттæ арæзт цæуы æппæт æмвæзадыл дæр.
Уавæр зæрдæхсайгæ кæй у, æмæ алы æнæнхъæлæджы уавæртæм цæттæ уæвын кæй хъæуы, уый фылдæр бæрнондзинад домы медицинæйы къабазы кусджытæй. Цæгат Ирыстоны дзæбæхгæнæн-профилактикон кусæндæттæ ахæм уавæрты архайдмæ куыд цæттæ сты? Бахъуаджы сахат ног низæфтауæгæй рынчын адæймагæн аккаг медицинон æххуыс бакæнынмæ фаг цæттæ сты? Уыцы фарстытæ сбæлвырд кæныны нысанимæ РЦИ-Аланийы Сæргълæууæг БИТАРТЫ Вячеслав бабæрæг кодта Тагъд медицинон æххуысы республикон клиникон рынчындоны дæлхайæдтæ.
Цæгат Ирыстоны æнæниздзинад хъахъхъæнынады министр Годжыцаты Тамерлан фембæлды рæстæг куыд радзырдта, афтæмæй республикæйы медицинон кусæндæттæ æххæстæй ифтонг сты хъæугæ диагностикон техникæйæ. «Ныридæгæн сбæлвырд кодтам, бахъуаджы сахат ног низæфтауæгæй рынчын адæм кæй бæрны уыдзысты, уыцы специалистты номхыгъд. Уыцы дохтыртæ æмæ иннæ медицинон кусджытæ сæ архайд араздзысты ног низæфтауæгимæ тохы сæрмагонд амынддзинæдты бындурыл», — бафиппайдта министр.
Рынчындоны дæлхайæдты уавæр сбæрæг кæнгæйæ, Битарты Вячеслав сæрмагонд æргом аздæхта, кусæндон хъæугæ хостæй куыд ифтонг у, уымæ дæр.
Зындгонд куыд у, афтæмæй æрæджы бындуронæй цалцæггонд æрцыдысты рынчындоны гастроэнтерологи æмæ гинекологийы хайæдтæ. Уыцы хайæдтæ дæр бабæрæг кодта республикæйы разамонæг. Специалисттæ йын куыд фехъусын кодтой, афтæмæй ныртæккæ ног цалцæггонд хайæдтæ ифтонггонд цæуынц хъæугæ медицинон техникæйæ. Уый фæстæ дыууæ хайады дæр цæттæ уыдзысты рынчынтæн балæггад кæнынмæ.
Профилон министрад æмæ рынчындоны разамонджытимæ аныхас кæныны фæстæ республикæйы Сæргълæууæг йæ фæндаг акодта афтектæй иуыл. Афтечы кусджытæ куыд радзырдтой, афтæмæй фæстаг рæстæг æлхæнджыты нымæц иуцасдæр фæфылдæр. Сæ ныхасмæ гæсгæ, хостæ æмæ æндæр медицинон товартæ сæм фаг ис. Иуцасдæр къуыхцытимæ афтекмæ æфтынц медицинон маскæтæ. Уыимæ, афтечы кусджыты ныхасмæ гæсгæ, хосты æргътыл нæ бафтыдтой.
Бæрæг куыд у, афтæмæй æрæджы РЦИ-Аланийы Сæргълæууæг Битарты Вячеслав цы сæрмагонд Указ бафыста, уый бындурыл уæлæмхасæн санитарон цæстдарды мадзæлттæ арæзт цæуынц республикæйы æппæт территорийыл дæр адæмы ног низæфтауæгæй бахъахъхъæныны тыххæй. Зæгъæм, уыцы документы уагæвæрдтæй иуы бындурыл, æрæджы республикæмæ фæсарæнтæй чи æрбаздæхт, уыцы адæм сæ балцы тыххæй бæстон бæрæггæнæнтæ хъуамæ фехъусын кæной сæрмагонд «комкоммæ бастдзинад»-ы линимæ (йæ номыр: 8-800-301-20-68).
Бæлвырд фæткмæ гæсгæ бæрнон ведомствæтæ æххæст кæнынц цæстдарды æндæр мадзæлттæ дæр.
РЦИ-Аланийы
Сæргълæууæджы æмæ Хицауады
пресс-службæ
