УФ-йы Пенсион фонды РЦИ-Аланийы хайад хъусын кæны, ныййарæджы капиталы программæйы ивддзинæдтæ кæй æрцыд, уый, стæй æмбарын кæны, сертификатæн цы хуызы райсæн уыдзæн, уый дæр.
Ныййарæджы капиталæн райсæн ис æрмæстдæр иунæг хатт. Йæ бæрц ныртæккæ у 466 617 сомы — 2020 азæй фæстæмæ иу сывæллон цы бинонтæн райгуыра, кæнæ 2020 азæй фæстæмæ схæссынмæ сывæллон цы бинонтæ райсой, уыдонæн, стæй, дыууæ сывæллоны цы бинонтæн ис, уыдонæн дæр (уыцы сывæллæттæ хъуамæ уой 2007-2019 азты гуырд, кæнæ сæ схæссынмæ райсын хъуыд уыцы азты);
æмæ 616 617 сомы — сæ дыккаг сывæллон 2022 азæй фæстæмæ кæмæн райгуырд, кæнæ, 2020 азæй фæстæмæ дыккаг сывæллон схæссынмæ чи райста, уыцы бинонтæн.
Сертификат райсынæн хъæуы ахæм документтæ:
— æмбæлгæ хуызы куырдиат; ныффыссæн ын ис Уæрæсейы Федерацийы Пенсион фонды кæцыфæнды территориалон хайады дæр, кæнæ та йæ бадæттын, Уæрæсейы Пенсион фонды сайты гражданинæн йæхицæн цы хи сæрмагонд кабинет ис, уырдæм, кæнæ та Бирæкъабазджын центрмæ (МФЦ);
— адæймаг Уæрæсейы Федерацийы гражданин кæй у, ууыл дзурæг документ, ома, паспорт, кæнæ, йæ бæсты йæм цы æндæр æвдисæндар ис, уый;
— бинонтæн сывæллон кæй райгуырд, кæнæ, схæссынмæ сывæллон кæй райстой, ууыл дзурæг документ — æппæт сывæллæттæн дæр сæ райгуырды тыххæй æвдисæндартæ (кæнæ, бинонтæ сывæллон кæй райстой схæссынмæ, ууыл дзурæг æвдисæндар);
— 2007 азы 1 январæй фæстæмæ чи райгуырд, уыцы сывæллон, кæнæ, сывæллæттæ уæрæсейаг граждæнтæ кæй сты, ууыл дзурæг документтæ;
— адæймагæн йæхи æмæ йæ бартæ бæлвырдгæнæг документ.
2021 азæй фæстæмæ ныййарæджы капитал райсыныл адæймаг хардз кæндзæн къаддæр рæстæг æмæ, цæмæй дзы спайда кæна, уымæ дæр æй бирæ рæстæг æнхъæлмæ кæсын нал хъæудзæн. Сертификат райсынæн бахъæудзæн фондз кусгæ боны.
2020 азы кæронмæ ныййарæджы капитал райсыны æмгъуыдтæ ивд не ‘рцæудзысты: сертификат бацæттæ кæнынц фынддæс кусгæ бонмæ, æхцатæй ныййарджытæн сæ бон цæмæй уа спайда кæнын, уый фæдыл сæ куырдиæттæм каст цæуы иу мæйы дæргъы.
Ныййарæджы сертификат райсыны тыххæй æппæт фарстытимæ бадзурæн ис ахæм телефонмæ: 51-52-78.
КЪНАТТАТЫ Маринæ
