Фыдыбæстæйы Стыр хæсты Уæлахизы 75 азы бæрæгбонмæ цæттæ кæныны фæлгæты Дзæуджыхъæуы Æхсæнадон советы æмæ республикæйы Адæмты хæлардзинады хæдзары хистæрты советы уæнгтæ Сергей МУРАДЯН, ПЛИТЫ Владимир, Фыдыбæстæйы Стыр хæсты архайджытæ ГУЛУТЫ Хизир æмæ ПАГÆТЫ Алыксандр Дыгуры районы Дур-Дуры хъæуы бабæрæг кодтой Фыдыбæстæйы Стыр хæсты архайæг ЦАЛИТЫ Сафарбийы 97 азы йыл сæххæсты бон.
Делегацийы разамонæг — Адæмты хæлардзинады хæдзары директор Кочиты Георги Сафарбийæн радта РЦИ-Аланийы Национ ахастдзинæдты фæдыл министрады æмæ Хæлардзинады хæдзары Кады гæххæтт зæрдылдарæн лæвæрттимæ.
Ахæм Кады гæххæтт лæвæрд æрцыд бынæттон хиуынаффæйады администрацийы сæргълæууæг Цагъаты Сосланæн дæр, Фыдыбæстæйы Стыр хæсты ветерантæ æмæ фæсчъылдымы фæллойгæнджытыл зæрдиагæй кæй ауды, уый тыххæй. Уымæй уæлдай Сафарбийæн арфæ ракæныны тыххæй горæтæгтæ семæ æрхуыдтой паддзахадон автомобилон инспекцийы кусджыты дæр. Уыдон Цæгат Ирыстоны æппæты зæронддæр шофырæн арфæ ракодтой, ныр дæр машинæ æмбæлгæ хуызы тæрын йæ бон кæй у, уый тыххæй. Уæ зæрдыл уын куы ‘рлæууын кæнæм, уæд дыууæ азы размæ Цæгат Ирыстоны мидхъуыддæгты министр Михаил Скоков Цалиты Сафарбийæн йæ 95 азы сæххæсты бон шофыры æвдисæндар радта æмæ уымæй ныр дæр у сæрыстыр.
Цалиты Сафарбийæн арфæ ракæнынмæ æрцыдысты Дыгуры районы администрацийы сæргълæууæг Хъодзасты Марклен, районы Ныхасы сæрдар Дзагуырты Атарбег, районы Ветеранты советы сæрдар Биасты Олег. Иу ныхасæй, горæтæгтæ Фыдыбæстæйы Стыр хæсты архайæгæн уыцы бон сарæзтой рæсугъд æмæ мидисджын бæрæгбон. Алы хатт куыд вæййы, афтæ ныр дæр уым уыдис фронтаг 100 граммы. Хуыздæр дагестайнаг коньячы хуызы йæ æрласта Дзæуджыхъæуы Æхсæнадон советы къамисы сæрдар Вилли Курбанов, традицион ирон æртæ чъирийы та æрбахаста Цагъаты Сослан. Фыдыбæстæйы Стыр хæсты ветерантæ æрымысыдысты сæ хæстон фæндæгтæ, дзырдтой фæсивæды патриотон хъомыладыл, арфæ кодтой, ахæм хъарм фембæлд сын чи сарæзта, уыцы хъæппæрисджын адæмæн.
ХЪАЙТЫХЪТЫ Тамарæ
