Уалдзыгон куыстытæ горæты
Уалдзæджы райдайæны тынг бирæ куыстытæ сæвзæры æхсæнадон царды. Фæстаг бонты Дзæуджыхъæуы администрацийы хъæппæрисæй горæты уынгты бæлæсты цъуппытæ æмæ уæлдай къалиутæ лыггонд цæуынц. Знон нæ республикæйы журналисттæ бабæрæг кодтой, уалдзыгон куыстытæ кæм райдыдтой, уыцы объекттæ.
Медицинон колледжы фæзы, кæддæр, 60 азы размæ цы хихджын æмæ æндæр бæлæстæ сагъд æрцыд, уыдон абон тæссаг уавæр сæвзæрын кодтой. Колледжы сæргълæууæджы хæдивæг Цыдаты Хъазыбег куыд радзырдта, афтæмæй, бæлæстæ æрцыдысты сагъд 1968 азы.
— Уæдæй нырмæ сæм зылд никуы æрцыд. 2014 азы куырдиат ныффыстам горæты бынæттон хиуынаффæйады администрацимæ, цæмæй нын нæ бæлæстæм базылдаиккой, æхсæдинаг къалиутæ бахсæстаиккой, лыггæнинаг цъуппытæ алыг кодтаиккой, æмбыд зæнгтæ кæмæн уыд, уыдон та, цæмæй бындзарæй акалдтаиккой. Фæлæ нæм йæ хъус ничи æрдардта. Æмæ фæстагмæ сæ уавæр бынтон тæссаг ссис.
Зæрдыл дарын хъæуы уый, æмæ медколледжы фæзуат æдзухдæр адæмæй дзаг у. Уыдис нæм цаутæ, тыхджын къæвдаты æмæ дымгæты рæстæг бæлæстæ куы афæлдæхтысты. Нæ амондæн, уыцы рæстæг бынаты ничи фæцис æндæр æнæ фыдбылызæй нæ баззадаиккам. Ацы хатт дæр та бадзырдтам администрацимæ æмæ нын нæ уавæрмæ уайтагъд æркастысты. Мит дæр æмæ къæвда дæр ницæмæ æрдаргæйæ, специалисттæ бæлвырд бакуыстой æмæ ныр æдæрсгæйæ нæ фæзы цæуæм, — загъта Цыдаты Хъазыбег.
Бæлæстæ калыныл æхсæнады бирæ ныхæстæ цæуы. Горæты цъæхвæлысты куыстуаты управленийы хицауы хæдивæг Бирæгъты Аслан та бæлвырд радзырдта, бæлæстæ калыны æмæ æхсæдыны куыст кæй у пъланон, афæдзы афоны куыст.
— Администрацимæ ахæм куырдиæттæ куы æрбацæуы, уæд уал мах сæрмагондæй «Влад Лес Экологи», зæгъгæ, организацийы специалисттæ-экологтæм фæдзурæм. Уыдон скæнынц иртасæн куыст æмæ уыдоны бæрæггæнæнтæм гæсгæ, барвæндонæй бавналæм ацы куыстмæ. Архайæм, закъонмæ гæсгæ, технологиты домæнтæ æххæст кæнгæйæ, — дзырдта Бирæгъты Аслан.
Куыстытæ æрмæст бæлæстæ æхсæдыныл не ‘рынцадысты. Æрбахæццæ кæны уалдзæджы бæрæгбон — 8 мартъи æмæ та, куыд алы хатт, афтæ ныр дæр базаргæнджытæ сæ продукци равæрдзысты Центрон базары фæзы.
Фæлæ, нæ республикæйы Хицауад уынаффæ рахаста, Центрон базармæ сæдæ метрæй æввахсдæр æнæзакъонæй уæйкæнынады хъуыддагæн æруадзæн кæй нал ис, ахæм ног фыст республикон закъон. Уый тыххæй та журналисттæн бæлвырддæр радзырдта Дзæуджыхъæуы Ирыстойнаг районы префект Дзеранты Георги.
— Райдыдтам аразын рейдтæ Центрон базары алыварс. Фыццаджыдæр, ацы мадзал у æдасдзинады фарста. Бирæ азты дæргъы-иу ацы ран бæрæгбæтты агъоммæ адæмæй азмæлæн нæ уыд. Равæрдтой-иу уæйгæнджытæ сæ продукци. Уæлдай хатт дзурын нæ хъæуы, цы теракттæ нæм æрцыд, уый тыххæй. Æмæ ныр «æнæсанкцион базар», кæй хонæм, уый нал уыдзæн. Бæрæгбоны фæдыл йæ продукци ауæй кæнын кæй фæнды, уыдонæн та, табуафси, горæты администраци армукъатæ саразынæн фæзтæ радих кодта. Владикавказскаяйы уынджы, Олимпаг парчы фæзы, Куйбышев æмæ Магкайы-фырты уынгты сæрмагонд фæзты. Иу хатт ма зæгъын, уый у æдасдзинады мадзал, — загъта префект.
Сабырдзинады проспекты дæр уалдзыгон куыстытæ сæ тæмæны бацыдысты. Къахт æрцыдысты доны хæтæлтæ. Баивдзысты сæ ногтæй. Организаци «Ир СТОУН»-ы сæйраг инженер Беслехъоты Руслан куыд радзырдта, афтæмæй канд доны хæтæлтыл нæ кусынц.
— Электрон тыхы телтæ дæр иууылдæр, трамвайты линитæй фæстæмæ, зæххы бын ныккæндзыстæм. Уый у ногдзинад. Нæ куыст кæндзыстæм фæлтæргай. Ныр уал бæрæг кæнæм нæ куысты фыццаг хайы хæрзхъæддзинад. Доны хæтæлтæ баивынæн кæй райдыдтам, уыцы куыст. Скъахтам участоктæ, бацæттæ сæ кодтам ног хæтæлтæ сæвæрынмæ. Уый фæстæ сæ магистралон хаххимæ баиу кæндзыстæм. Нæ куыстытæ кæронмæ фæуыдзысты ацы азы кæронмæ, — загъта Беслехъоты Руслан. Организацийы специалисттæ сæ куыст ног хуызы кæй кæнынц, ома, сæ архайды алы къæпхæны хæрзхъæддзинад кæй бæрæг кæнынц, уый æнтыстдзинады къахдзæф у, уымæн æмæ кусджыты зæрдæ уый фæстæ не ‘хсайдзæн, рæдыд æруагътой æви нæ.
Саутæты Тамилæ
Къамтæ систа Хъайырты Дианæ
